Auto Sales: బలహీన డిమాండ్‌తో తగ్గిన వాహన రిటైల్ అమ్మకాలు

దిశ, బిజినెస్ బ్యూరో: డిమాండ్ బలహీనపడిన కారణంగా దేశీయ వాహన పరిశ్రమలో రిటైల్ అమ్మకాలు గణనీయంగా క్షీణించాయి. ప్యాసింజర్ వాహనాలతో పాటు టూవీలర్ అమ్మకాలు కూడా దెబ్బతినడంతో ఈ ఏడాది ఫిబ్రవరిలో మొత్తం వాహనాల విక్రయాలు 7 శాతం పడిపోయాయని డీలర్స్ సంఘం ఫాడా గురువారం ప్రకటనలో వెల్లడించింది. ఫాడా వివరాల ప్రకారం, గత నెలలో మొత్తం 18,99,196 వాహనాలు అమ్ముడయ్యాయి. ఇవి గతేడాది ఇదే నెలలో నమోదైన 20,46,328 యూనిట్లతో పోలిస్తే 7 శాతం తగ్గాయి. అన్ని విభాగాల్లోనూ అమ్మకాలు క్షీణించాయని ఫాడా అధ్యక్షుడు సీ ఎస్ విఘ్నేశ్వర్ తెలిపారు. సమీక్షించిన నెలలో ప్యాసింజర్ వాహనాలు 3.03 లక్షల యూనిట్లతో 10 శాతం తగ్గాయి. టూవీలర్ విభాగంలో అమ్మకాలు 6 శాతం, కమర్షియల్ వాహనాలు 9 శాతం, ట్రాక్టర్ విక్రయాలు 14.5 శాతం క్షీణించాయి. అమ్మకాలు పడిపోవడంతో ప్రస్తుత నెలలో ఇన్వెంటరీలు భారీగా మిగిలిపోతాయని డీలర్లు ఆందోళన వ్యక్తం చేస్తున్నారు. ఇప్పటికే ఇన్వెంటరీలు 50-52 రోజులకు పెరిగాయని తెలిపారు. తయారైన వాహనాలు అమ్ముడుపోకుండా డీలర్ల వద్ద ఉండే కాలాన్ని ఇన్వెంటరీలుగా పరిగణిస్తారు. ధరల సర్దుబాటూ, బలహీన కస్టమర్ సెంటిమెంట్, కఠినంగా మారిన ఫైనాన్స్ నిబంధనల సమస్యలను పరిష్కరించడం ద్వారా అమ్మకాలు పెరిగేందుకు చర్యలు తీసుకోవాలని కంపెనీలు భావిస్తున్నాయి.