కార్మిక శాఖలో భారీ అవినీతి.. ఏసీబీ విచారణకు మాజీ ఉద్యోగి డిమాండ్

189

దిశ, తెలంగాణ బ్యూరో : రాష్ట్ర కార్మిక శాఖలో మరోసారి భారీ అవినీతి ఆరోపణలు వెలుగుచూశాయి. భవన నిర్మాణ కార్మికుల సంక్షేమ బోర్డుకు ‘సెస్’ రూపంలో వెళ్ళాల్సిన నిధులు గోల్‌మాల్ అయ్యాయని ఇటీవల పెద్ద ఎత్తున ఆరోపణలు వచ్చాయి. దీంతో పదవి విరమణ పొందిన ఓ ఉద్యోగి.. ఏడేళ్ళుగా ఈ తతంగం జరుగుతూనే ఉన్నదని, తెలంగాణ రాష్ట్రం ఆవిర్భవించక ముందు నుంచి ఈ ఆరోపణలు ఉన్నాయన్నారు. అయినా, ఉన్నతాధికారులు పట్టించుకోలేదని లోగుట్టును బయటపెట్టారు. ఇప్పటికైనా ఈ అవినీతి ఎంతమేర కూరుకుపోయిందో వెలికితీయడానికి ఏసీబీతో సమగ్ర దర్యాప్తు జరిపించాల్సిందిగా కార్మిక శాఖ ప్రత్యేక ప్రధాన కార్యదర్శి రాణి కుముదినికి రిటైర్డ్ డిప్యూటీ కమిషనర్ రాజేందర్ తాజాగా లేఖ రాశారు. ఈ అవినీతి భాగోతం సుమారు రూ. 100 కోట్ల మేర ఉండొచ్చని ఆయన అంచనా వేశారు.

కార్మిక శాఖలో డిప్యూటీ కమిషనర్‌గా ఉన్నప్పుడు తాను 2014లో రాష్ట్రం ఏర్పడకముందే లేఖ రాశానని, కానీ ఉన్నతాధికారులు దీని గురించి పట్టించుకోలేదని, ఆ తర్వాత 2019లో విజిలెన్స్ కమిషన్ సైతం దీనిపై సమగ్రమైన నివేదికను కోరిందని అన్నారు. కానీ ఆ శాఖ ఉన్నతాధికారులు పట్టీ పట్టనట్లుగానే ఉన్నారని ఆ లేఖలో రాజేందర్ గుర్తుచేశారు. కార్మిక సంక్షేమం కోసం చట్టప్రకారం చెల్లించాల్సిన ‘సెస్’ను ఎగవేసినవారిపై చర్యలు తీసుకోవాలని, వారి నుంచి రెండు శాతం వడ్డీతో వసూలు చేయాలని డిమాండ్ చేశారు. సుమారు 60 రిజిస్టర్డ్ సంస్థలు ఈ ఎగవేతకు పాల్పడినట్లు గుర్తుచేశారు. అవినీతి జరిగినట్లు ప్రాథమిక సాక్ష్యాధారాలు ఉన్నందున అవినీతి నిరోధక శాఖ డైరెక్టర్ జనరల్ ద్వారా సమగ్ర దర్యాప్తు జరిపించాలని రాణి కుముదినిని రాజేందర్ కోరారు.

గల్లీ టూ గ్లోబల్ అప్డేట్స్.. రంగులు మారే రాజకీయాలపై ఆసక్తికర విశ్లేషణలు.. దమ్మున్న వార్తలు.. ఎప్పటికప్పుడు.. వాట్సాప్ ద్వారా పొందాలంటే.. మా నెంబ‌ర్‌ +91 88864 24242 ను సేవ్ చేసుకొని, "START" అని వాట్సాప్ ద్వారా మెసేజ్ పంపండి..