బండి సంజయ్ ప్రజా సంగ్రామ యాత్ర.. ముగింపు సభ ఎక్కడో తెలుసా..?

దిశ ప్రతినిధి, కరీంనగర్: బీజేపీ రాష్ట్ర అధ్యక్షుడు బండి సంజయ్ చేపట్టిన ప్రజా సంగ్రామ యాత్ర ముగింపు సభ హుస్నాబాద్‎లోనే నిర్వహించనున్నామని రాష్ట్ర ఉపాధ్యక్షుడు, పాదయాత్ర ప్రముఖ్ డాక్టర్ జి మనోహర్ రెడ్డి, సహ ప్రముఖ్‎లు టి.వీరేందర్ గౌడ్, లంకల దీపక్ రెడ్డిలు ప్రకటించారు. హుజురాబాద్ ఉప ఎన్నికల షెడ్యూల్ విడుదలైన నేపథ్యంలో ఎన్నికల కోడ్ అమల్లో ఉన్నందున కరీంనగర్ జిల్లా పరిధిలో ర్యాలీలు, భారీ బహిరంగ సభలపై నిషేధం ఉన్నందున.. వచ్చే నెల 2 వరకు సిద్దిపేట జిల్లాలోనే పాదయాత్రను కొనసాగిస్తామన్నారు. శుక్రవారం కోహెడ నుంచి ప్రారంభమయ్యే యాత్ర శ్రీరాములపల్లి, పర్వేద, పందిళ్ల మీదుగా పొట్లపల్లి వరకు సాగనుంది. తొలిదశ పాదయాత్ర ముగింపు సందర్భంగా అక్టోబర్ 2న హుస్నాబాద్ పట్టణంలో భారీ బహిరంగ సభ నిర్వహిస్తున్నట్లు తెలిపారు.