Visakha: సీఎం జగన్‌కు థ్యాంక్స్ చెప్పిన నిర్మాత సి. కల్యాణ్
దిశ,డైనమిక్ బ్యూరో: సినిమా విడుదలైన ఫస్ట్ డేనే ఫైబర్ నెట్ ద్వారా ప్రజలు ఇంటి వద్దే వీక్షించేలా ఏపీ ప్రభుత్వం ఫస్ట్ డే ఫస్ట్ షో కార్యక్రమాన్ని తీసుకువచ్చిన సంగతి తెలిసిందే. ఈ ఫస్ట్ డే ఫస్ట్ షో కార్యక్రమంపై విమర్శలు సైతం వెల్లువెత్తాయి. ఈ కార్యక్రమం వల్ల డిస్ట్రిబ్యూటర్లు, ఎగ్జిబిటర్లు నష్టపోతారని పలువురు నిర్మాతలు ఆందోళన వ్యక్తం చేశారు. ఇప్పటికీ అభ్యంతరాలు వ్యక్తం చేస్తున్న సంగతి తెలిసిందే.
అయితే ఇలాంటి సమయంలో ఫస్ట్ డే ఫస్ట్ షో కార్యక్రమం అద్భుతమని నిర్మాత సి.కల్యాణ్ అన్నారు. ఈ ఫస్ట్ డే ఫస్ట్ షో నిర్ణయం తీసుకున్నందుకు సీఎం వైఎస్ జగన్‌కు సినీ నిర్మాత సి.కల్యాణ్ ధన్యవాదాలు తెలిపారు. ఈ కార్యక్రమం మారుమూల గ్రామాల్లోని ప్రేక్షకులకు ఎంతో ఉపయోగకరంగా ఉంటుందని అభిప్రాయపడ్డారు. ఈ నిర్ణయం వల్ల నిర్మాతలకు, థియేటర్లకు ఎలాంటి నష్టం వాటిల్లదని చెప్పుకొచ్చారు. చిన్న సినిమాలు బతికేందుకు ఈ కార్యక్రమం ఎంతగానో ఉపయోగపడుతుందని చెప్పుకొచ్చారు. ఈ అంశంపై సినీ ఇండస్ట్రీకి చెందిన కొందరు విమర్శలు చేయడాన్ని పట్టించుకోవాల్సిన అవసరం లేదన్నారు. నేడు విమర్శించిన వారే రేపు ప్రశంసిస్తారని సి.కల్యాణ్ చెప్పారు.
ఈ ఫస్ట్ డే ఫస్ట్ షో కార్యక్రమాన్ని రాష్ట్ర ఐటీ శాఖ మంత్రి గుడివాడ అమర్నాథ్ శుక్రవారం విశాఖలోని పార్క్ హోటల్‌లో ప్రారంభించారు. మంత్రి అమర్నాథ్ ఏపీ ఫైబర్ నెట్ ద్వారా తొలి సినిమా 'నిరీక్షణ'ను విడుదల చేశారు.
