కుటుంబం సామాజిక బహిష్కరణ.. ఈసారి పాపం అనిపించదేమో!
శ్రీకాకులం జిల్లా రణస్థలం మండలం కొండమూలగాం గ్రామంలో కుటుంబంపై గ్రామ పెద్దలు సామాజిక బహిష్కరణ వేటు వేయడం జిల్లావ్యాప్తంగా చర్చనీయాంశమైంది.
దిశ, వెబ్డెస్క్: శ్రీకాకుళం జిల్లా రణస్థలం మండలం కొండమూలగాం గ్రామంలో కుటుంబంపై గ్రామ పెద్దలు సామాజిక బహిష్కరణ వేటు వేయడం జిల్లావ్యాప్తంగా చర్చనీయాంశమైంది. గ్రామానికి చెందిన ఒక కుటుంబం అనుసరిస్తున్న తీరుపై ఆగ్రహం వ్యక్తం చేస్తూ గ్రామస్తులు ఏకగ్రీవంగా ఈ నిర్ణయం తీసుకున్నారు. సదరు కుటుంబీకులు గ్రామంలోని పలు భూములను అక్రమంగా ఆక్రమించడమే కాకుండా, రెవెన్యూ రికార్డులను సైతం తారుమారు చేశారని గ్రామస్తులు ఆరోపిస్తున్నారు. దాంతో పాటు గ్రామంలోని సుమారు 18 కుటుంబాలను లక్ష్యంగా చేసుకుని, నిరంతరం దౌర్జన్యాలకు మరియు వేధింపులకు పాల్పడుతున్నట్లు గ్రామ పెద్దలు వెల్లడించారు.
గ్రామ కట్టుబాటు..
ఈ క్రమంలో గ్రామ శాంతిభద్రతలను కాపాడేందుకు, సదరు కుటుంబంతో ఎవరూ సంబంధాలు పెట్టుకోకూడదని, వారిని సామాజికంగా దూరం పెట్టాలని పంచాయతీలో తీర్మానించారు. సమాజంలో ఇలాంటి బహిష్కరణలు చట్టరీత్యా నేరమని తెలిసినప్పటికీ, భూ సమస్యలు మరియు దౌర్జన్యాల తీవ్రత వల్లే తాము ఈ నిర్ణయానికి రావాల్సి వచ్చిందని బాధితులు పేర్కొంటున్నారు. దీనిపై సమాచారం అందుకున్న పోలీసులు మరియు రెవెన్యూ అధికారులు క్షేత్రస్థాయిలో విచారణ చేపట్టి, సమస్యను పరిష్కరించే దిశగా అడుగులు వేస్తున్నారు.
