హుందాగా ఉండాల్సింది అలా మాట్లాడతారా? : కెఎస్ జవహర్

దిశ, వెబ్ డెస్క్ : ఆంధ్రప్రదేశ్ ఎస్సీ కమిషన్ చైర్మన్ కె.ఎస్.జవహర్ (KS Jawahar) తాజాగా వైఎస్ఆర్ కాంగ్రెస్ పార్టీ (YCP) నేతల తీరుపై తీవ్ర ఆగ్రహం వ్యక్తం చేశారు. ముఖ్యంగా శ్రీవారి ప్రసాదం (Laddu) కల్తీ అంశం రాష్ట్రవ్యాప్తంగా సంచలనం సృష్టిస్తుంటే, ప్రజల దృష్టిని మళ్లించేందుకు మాజీ సీఎం జగన్ మోహన్ రెడ్డి (YS Jagan) కుట్రలు చేస్తున్నారని ఆయన ఆరోపించారు. పవిత్రమైన తిరుమల (Tirumala) ప్రసాదం విషయంలో జరిగిన అపచారాన్ని కప్పిపుచ్చుకోవడానికి రాజకీయ డ్రామాలు ఆడుతున్నారని మండిపడ్డారు. హుందాగా ఉండాల్సిన నాయకులు సహనం కోల్పోయి, ముఖ్యమంత్రిపై నీచమైన పదజాలం వాడటం ప్రజాస్వామ్యానికి గొడ్డలిపెట్టు అని అంబటి రాంబాబు వ్యాఖ్యలను ఉద్దేశిస్తూ జవహర్ ఆవేదన వ్యక్తం చేశారు.

వైసీపీ నేత అంబటి రాంబాబు (Ambati Rambabu) వ్యాఖ్యలపై స్పందిస్తూ.. ఆయన పూర్తిగా నిస్పృహలో ఉండి మాట్లాడుతున్నారని అన్నారు. ముఖ్యమంత్రిపై అగౌరవంగా మాట్లాడటం ఆయన దిగజారుడు రాజకీయాలకు నిదర్శనమని విమర్శించారు. ఆదర్శంగా ఉండాల్సిన రాజకీయ నాయకులు ఇలాంటి భాషను వాడటం వల్ల సమాజంలో చెడు సంకేతాలు వెళ్తాయన్నారు. ప్రజలు ఇప్పటికే ఈ తరహా ప్రవర్తనను పూర్తిగా వ్యతిరేకిస్తున్నారని హెచ్చరించారు. భవిష్యత్తులో ఇటువంటి అనుచిత వ్యాఖ్యల విషయంలో అప్రమత్తంగా ఉండాలని కోరారు. లేనిపక్షంలో ప్రజాస్వామ్య వ్యవస్థకే ముప్పు వాటిల్లుతుందని జవహర్ హెచ్చరించారు.