పవన్ మార్షల్ ఆర్ట్స్ జర్నీ.. ఓ అదృష్టంగా భావిస్తున్నా! సోనూసూద్ ప్రత్యేక వీడియో విడుదల

దిశ, డైనమిక్ బ్యూరో: ఆంధ్రప్రదేశ్ ఉప ముఖ్యమంత్రి, పవర్‌స్టార్ పవన్ కల్యాణ్‌ మార్షల్ ఆర్ట్స్ ప్రస్థానాన్ని వివరిస్తూ ప్రముఖ నటుడు సోనూసూద్ మంగళవారం 'ఎక్స్' (ట్విట్టర్) వేదికగా ఓ ప్రత్యేక వీడియోను విడుదల చేశారు. పవన్‌ కల్యా‌ణ్‌కు ఇటీవల ప్రతిష్టాత్మక మార్షల్ ఆర్ట్స్ పురస్కారం లభించిన నేపథ్యంలో, ఆయన సాధించిన విజయాలను సోనూసూద్ ఈ వీడియో ద్వారా హిందీలో వాయిస్ ఓవర్ ఇస్తూ అభిమానులతో పంచుకున్నారు.

సోనూసూద్ ట్వీట్ సారాంశం

ఈ సందర్భంగా సోనూసూద్ స్పందిస్తూ.. ‘ఆంధ్రప్రదేశ్ ఉప ముఖ్యమంత్రి పవన్ కల్యాణ్ మార్షల్ ఆర్ట్స్ ప్రయాణాన్ని నా గొంతు ద్వారా హిందీలో వినిపించడాన్ని ఓ అదృష్టంగా భావిస్తున్నాను. మార్షల్ ఆర్ట్స్ రంగంలో అంతర్జాతీయ గుర్తింపు సాధించిన పవన్ కల్యాణ్‌కి నా హృదయపూర్వక శుభాకాంక్షలు" అని పేర్కొన్నారు. ఈ వీడియోలో పవన్ కల్యాణ్ యువకుడిగా ఉన్నప్పటి మార్షల్ ఆర్ట్స్ సాధన, కరాటే విన్యాసాలు, సాహసోపేతమైన విన్యాసాల ఫొటోలతో పాటు.. ఆయన సినిమాల్లో ప్రదర్శించిన మార్షల్ ఆర్ట్స్ ఫైటింగ్ దృశ్యాలను సోనూసూద్ పొందుపరిచారు.

'కెంజుట్సు'లో అరుదైన ఘనత

పవన్ కల్యాణ్‌కు ఇటీవల జపాన్ ప్రాచీన కత్తిసాము యుద్ధకళ 'కెంజుట్సు' (Kenjutsu) లో అరుదైన గౌరవం దక్కిన విషయం తెలిసిందే. ఈ విభాగంలో ఆయనకు ప్రతిష్టాత్మక 'ఫిఫ్త్ డాన్' పురస్కారం లభించడమే కాకుండా, 'టైగర్ ఆఫ్ మార్షల్ ఆర్ట్స్' బిరుదుతో సత్కరించారు. కేవలం వెండితెరపైనే కాకుండా, నిజజీవితంలోనూ యుద్ధ విద్యలలో ఆయనకున్న ప్రావీణ్యానికి ఈ అంతర్జాతీయ గుర్తింపు నిదర్శనంగా నిలిచింది.

మూడు దశాబ్దాల కృషి

పవన్ కల్యాణ్‌ సినిమాల్లోకి రాకముందే చెన్నైలో ఉన్న రోజుల్లోనే ఆయన కరాటే, జపనీస్ సమురాయ్ యుద్ధ విద్యలపై ఆసక్తి పెంచుకున్నారు. గత మూడు దశాబ్దాలుగా ఆయన ఎంతో అంకితభావంతో, క్రమశిక్షణతో సాగించిన సాధన ఫలితంగానే నేడు ఈ ప్రపంచ స్థాయి గుర్తింపు లభించింది. ప్రస్తుతం ఏపీ డిప్యూటీ సీఎంగా ప్రజాసేవలో బిజీగా ఉన్న పవన్ కల్యాణ్‌కు, ఆయనకు ఇష్టమైన మార్షల్ ఆర్ట్స్‌లో అంతర్జాతీయ ఖ్యాతి దక్కడం పట్ల సినీ ప్రముఖులు, అభిమానులు హర్షం వ్యక్తం చేస్తున్నారు.