టాలీవుడ్ టు పాలిటిక్స్: నారా రోహిత్ పొలిటికల్ ఎంట్రీ అప్పుడే!

దిశ, వెబ్‌డెస్క్: టాలీవుడ్ హీరో నారా రోహిత్ తన రాజకీయ రంగప్రవేశంపై కీలక వ్యాఖ్యలు చేశారు. తిరుమల శ్రీవారిని దర్శించుకున్న అనంతరం మీడియాతో మాట్లాడిన ఆయన, ప్రత్యక్ష రాజకీయాల్లోకి రావడంపై స్పష్టతనిచ్చారు. రాజకీయాల్లోకి ఎప్పుడు వస్తారన్న ప్రశ్నకు స్పందిస్తూ.. "ఖచ్చితంగా రాజకీయాల్లోకి వస్తాను, కానీ దానికి ఇంకా సమయం ఉంది. సరైన సమయంలో నా రాజకీయ ప్రయాణాన్ని ప్రారంభిస్తాను" అని రోహిత్ పేర్కొన్నారు. ప్రస్తుతం తన దృష్టి అంతా సినిమాలపైనే ఉందని, మంచి కథలతో ప్రేక్షకులను అలరించడమే తన ప్రాధాన్యత అని ఆయన వెల్లడించారు.

కుటుంబ నేపథ్యం - అంచనాలు..

నారా చంద్రబాబు నాయుడు సోదరుని కుమారుడిగా, నారా లోకేష్‌కు సోదరుడిగా రోహిత్‌కు రాజకీయ నేపథ్యం ఉన్న సంగతి తెలిసిందే. గత ఎన్నికల సమయంలోనూ ఆయన పార్టీ తరపున ప్రచారం చేస్తారని వార్తలు వచ్చాయి. ఇప్పుడు స్వయంగా ఆయనే "సరైన సమయంలో వస్తా" అని ప్రకటించడంతో నారా అభిమానుల్లో మరియు రాజకీయ వర్గాల్లో ఆసక్తి నెలకొంది.