గుంటూరు జిజిహెచ్ లో స్క్రబ్ టైఫస్ మరణం!

దిశ, వెబ్ డెస్క్ : గుంటూరులోని జిజిహెచ్ లో మరో స్క్రబ్ టైఫస్ మరణం వెలుగు చూసింది. వ్యాధికి చికిత్స పొందుతూ ఓ వృద్ధురాలు ప్రాణాలు విడిచింది. వివరాల్లోకి వెళ్తే ప్రకాశం జిల్లా ఎర్రగొండకు చెందిన ధనమ్మ గత కొంత కాలంగా అనారోగ్యంతో బాధపడుతోంది. స్థానికంగా చికిత్స పొందుతున్నా ఆరోగ్యం కుదుటనపడలేదు. స్క్రాబ్ టైఫస్ గా అనుమానించి వైద్యులు ఆమెను గుంటూరులోని జిజిహెచ్ కు తరలించారు. తీవ్ర జ్వరం, ఇతర అనారోగ్య లక్షణాలతో ఆమెను జీజీహెచ్‌కు తీసుకురాగా, చికిత్స పొందుతూ మరణించినట్లు సమాచారం. ఈ మరణం స్థానికులలో ముఖ్యంగా వ్యవసాయ పనులు చేసే వారిలో ఆందోళన కలిగిస్తోంది. ఇది చిన్న నల్లి పురుగు (చైగర్ మైట్) కాటు ద్వారా సంక్రమించే ప్రమాదకరమైన బ్యాక్టీరియా వ్యాధి కావడం వల్ల ఆందోళన మరింత పెరుగుతోంది.

జీజీహెచ్‌లో ప్రత్యేక చర్యలు

​స్క్రబ్ టైఫస్ కేసుల పెరుగుదలను దృష్టిలో ఉంచుకుని ప్రభుత్వం అప్రమత్తమైంది. గుంటూరు జీజీహెచ్ లో వైద్యం అందించేందుకు ప్రత్యేక ఏర్పాట్లను చేసింది. స్క్రబ్ టైఫస్ వ్యాధి బారిన పడిన వారికి మెరుగైన చికిత్స అందించేందుకు ఆసుపత్రిలో ప్రత్యేక వార్డు (స్పెషల్ వార్డు) ను ఏర్పాటు చేసినట్లు సూపరింటెండెంట్ డాక్టర్ ఎస్.ఎస్.వి. రమణ తెలిపారు. ప్రస్తుతం పల్నాడు, బాపట్ల జిల్లాల నుంచి కూడా ఈ వ్యాధి లక్షణాలతో బాధితులు జీజీహెచ్‌కు వస్తున్నట్లు పేర్కొన్నారు. వారికి తక్షణ, సమర్థవంతమైన వైద్య సేవలు అందిస్తున్నట్లు వివరించారు.

వ్యాధిని గుర్తించడానికి రక్తపరీక్షలను చేస్తున్నారు. ప్రాథమిక దశలోనే గుర్తిస్తే డాక్సీసైక్లిన్ (Doxycycline) వంటి యాంటీబయాటిక్స్‌తో సులభంగా నయం చేయవచ్చని వైద్యులు చెబుతున్నారు. తీవ్రమైన కేసులలో అవయవాల వైఫల్యం (ఊపిరితిత్తులు, కాలేయం, కిడ్నీలు, మెదడు) వంటి సమస్యలు రాకుండా ఉండేందుకు ప్రత్యేక చికిత్స అందిస్తున్నట్లు వైద్యులు పేర్కొంటున్నారు.

జీజీహెచ్‌లో చికిత్సతో పాటు, వ్యాధి నియంత్రణకు అవగాహన కార్యక్రమాలను కూడా నిర్వహిస్తున్నారు. పొలాలు, పొదలు ఎక్కువగా ఉన్న ప్రాంతాలకు వెళ్లేవారు పురుగుల నివారిణి (ఇన్సెక్ట్ రిపెలెంట్) వాడాలని, పూర్తిగా కప్పి ఉంచే దుస్తులు ధరించాలని సూచిస్తున్నారు. పరిసరాలను శుభ్రంగా ఉంచుకోవడం, గడ్డి లేదా పొదలు పెరగకుండా చూసుకోవడం వంటి నివారణ చర్యలను పాటించాలని ప్రజలకు తెలియజేస్తున్నారు.

ముందస్తు జాగ్రత్తలు అవసరం

​గత నెల రోజుల్లో ఉమ్మడి గుంటూరు జిల్లాలో ఇప్పటికే జ్యోతి, నాగమ్మ అనే ఇద్దరు మహిళలు ప్రాణాలు విడిచారు. ధనమ్మ మరణం ఈ వ్యాధి తీవ్రతను మరోసారి గుర్తు చేసింది. ఈ వ్యాధికి సరైన సమయంలో చికిత్స అందకపోతే మరణాల రేటు 30శాతం వరకు పెరిగే ప్రమాదం ఉందని వైద్య నిపుణులు హెచ్చరిస్తున్నారు. కాబట్టి మూడు రోజులకు మించి జ్వరం తగ్గకపోతే వెంటనే సమీప ఆసుపత్రిలో స్క్రబ్ టైఫస్ పరీక్ష చేయించుకోవడం అత్యవసరం అని నిపుణులు సూచిస్తున్నారు.