CM Jagan: జగన్‌ను ఎలాగైనా మట్టుబెట్టాలని చూస్తున్నారు: మంత్రి అంబటి సంచలన వ్యాఖ్యలు
దిశ, వెబ్‌డెస్క్: సీఎం జగన్‌మోహన్ రెడ్డిని ఎలాగైనా మట్టుబెట్టాలని చూస్తున్నారంటూ మంత్రి అంబటి రాంబాబు సంచలన వ్యాఖ్యలు చేశారు. తమ అధినేతపై దుండగులు దాడికి పాల్పడినందుకు గాను ఆయన ఆధ్వర్యంలో సత్తెనపల్లిలో వైసీపీ నేతలు నల్ల జెండాలతో ర్యాలిని నిర్వహించారు. ఈ సందర్భంగా ఆయన మీడియాతో మాట్లాడుతూ.. అద్భుతమైన సంక్షేమ పథకాలతో ప్రజాధరణ పొందుతున్న జగన్‌పై ఎవరికో కన్ను కుట్టిందని ఆరోపించారు. తమ ప్రభుత్వాన్ని. సీఎం జగన్‌ను నేరుగా ఎదుర్కొలేకే చంద్రబాబు దొంగ చాటుగా దాడికి పాల్పడుతున్నారని ఆగ్రహం వ్యక్తం చేశారు. గతంలోనూ విజయవాడలో ఓ రాజకీయ శక్తిగా ఎదుగుతున్న వంగవీటి మోహన రంగాను టీడీపీయే హత్య చేయించిందిని, ముద్రగడ పద్మనాభం కుటుంబాన్ని కూడా అనేక ఇబ్బందులకు గురి చేశాడని ఆరోపించారు. ఓ పార్టీ ఎదుగుతుంటే చూసే తత్వం చంద్రబాబుది కాదని అన్నారు. ప్రజాస్వామ్య దేశంలో ఇలాంటి దాడులు హేయమని ధ్వజమెత్తారు. ఎవరు ఎన్ని కుట్రలు చేసినా.. ఏపీలో మళ్లీ జగన్ ప్రభుత్వమే కొలువుదీరబోతోందని జోస్యం చెప్పారు. చంద్రబాబు పార్టీకి డిపాజిట్లు గల్లంతవ్వడం ఖాయమని అన్నారు.
