రాష్ట్ర సినీ రంగానికి కొత్త ఊపు: ఎఫ్టీవీటీడీసీ నూతన కమిటీ నియమాకం
ప్రతిష్టాత్మకమైన 'ఏపీ స్టేట్ ఫిల్మ్, టెలివిజన్, అండ్ థియేటర్ డెవలప్మెంట్ కార్పొరేషన్' నూతన పాలకమండలిని రాష్ట్ర ప్రభుత్వం అధికారికంగా ప్రకటించింది...
దిశ, వెబ్ డెస్క్: ప్రతిష్టాత్మకమైన 'ఏపీ స్టేట్ ఫిల్మ్, టెలివిజన్, అండ్ థియేటర్ డెవలప్మెంట్ కార్పొరేషన్' (APSFTVTDC) నూతన పాలకమండలిని రాష్ట్ర ప్రభుత్వం అధికారికంగా ప్రకటించింది. ఈ కార్పొరేషన్ ఛైర్మన్గా పి. భరత్ భూషణ్ను నియమిస్తూ ప్రభుత్వం ఉత్తర్వులు జారీ చేసింది. అలాగే, సంస్థ వైస్ ఛైర్మన్గా చిక్కాల మెహర్ రమేష్ కుమార్ను నియమించారు. రాష్ట్రంలో సినిమా, టెలివిజన్, మరియు నాటక రంగాల అభివృద్ధికి సరికొత్త వ్యూహాలతో ముందుకు సాగాలనే సంకల్పంతో ఈ నియామకాలు జరిగాయి.
బోర్డు డైరెక్టర్లుగా మరో 14 మంది
ఛైర్మన్, వైస్ ఛైర్మన్లతో పాటు సినీ పరిశ్రమకు చెందిన ప్రముఖులతో కూడిన మరో 14 మందిని బోర్డు డైరెక్టర్లు (సభ్యులు)గా ప్రభుత్వం నియమించింది. ఈ కమిటీలో సీనియర్ నటుడు సుమన్ తల్వార్, ప్రముఖ నటుడు ఎస్. శివాజీ, టాలీవుడ్ ప్రముఖ నిర్మాత వివేక్ కూచిభొట్ల (కూచిభొట్ల సుబ్రహ్మణ్య వివేకానంద), చదలవాడ శ్రీనివాసరావు, మరియు వి. సముద్ర వంటి పరిశ్రమ దిగ్గజాలకు స్థానం కల్పించారు. అలాగే ప్రసిద్ధ సినీ రచయిత బుర్రా సాయిమాధవ్ కూడా ఈ డైరెక్టర్ల జాబితాలో ఉన్నారు.
ప్రముఖులతో నూతన కమిటీ
వీరితో పాటు వై. ఝాన్సీ, కే. ఉమామహేశ్వర రావు, మీర్.ఎస్, కందిమళ్ల సాంబశివరావు, ఏ. సత్యనారాయణ, ఎస్. వెంకట కృష్ణారెడ్డి, జీ. రాజ్ వెంకటేశ్వర యాదవ్, మరియు డి. సత్యనారాయణలు ఈ బోర్డులో సభ్యులుగా బాధ్యతలు చేపట్టనున్నారు. వివిధ విభాగాల్లో అపార అనుభవం ఉన్న సినీ, నాటక రంగ ప్రముఖులతో ఏర్పాటైన ఈ నూతన కమిటీ.. ఆంధ్రప్రదేశ్లో కళారంగాల అభివృద్ధికి, మౌలిక వసతుల కల్పనకు మరియు కళాకారుల సంక్షేమానికి పెద్దపీట వేస్తుందని పరిశ్రమ వర్గాలు ఆశాభావం వ్యక్తం చేస్తున్నాయి.
