రేకుల షెడ్ లో 80 తులాల బంగారం

దిశ, వెబ్ డెస్క్ : గుంటూరు (Guntur) జిల్లా తెనాలిలో (Tenali) టాస్క్ ఫోర్స్ పోలీసులు నిర్వహించిన ఆకస్మిక తనిఖీల్లో భారీగా అక్రమ బంగారం (Gold), వెండి (Silver) వెలుగుచూడటం స్థానికంగా తీవ్ర కలకలం రేపింది. నగరంలోని ఒక సామాన్యమైన రేకుల షెడ్డులో నివసిస్తున్న ఒక కుటుంబం వద్ద అనూహ్య రీతిలో భారీ మొత్తంలో నగలు ఉండటాన్ని చూసి అధికారులు సైతం విస్మయానికి గురయ్యారు. పోలీసుల సమాచారం ప్రకారం అనుమానిత ఇంట్లో తనిఖీలు చేపట్టగా సుమారు 80 తులాల బంగారం, 15 కిలోల వెండి స్వాధీనం చేసుకున్నారు. ప్రాథమిక విచారణలో ఒక వ్యక్తి ఆ భారీ మొత్తంలో బంగారాన్ని తీసుకువచ్చి తన అత్తగారి ఇంట్లో రహస్యంగా దాచిపెట్టినట్లు తేలింది. ఈ అక్రమ నిల్వల వెనుక ఉన్న మూలాలను వెలికితీసేందుకు పోలీసులు అత్త, అల్లుడిని అదుపులోకి తీసుకుని విచారిస్తున్నారు. అంత పెద్ద మొత్తంలో బంగారం ఎక్కడి నుండి వచ్చింది? అది చోరీ సొత్తా లేక ఇతర అక్రమ లావాదేవీలకు సంబంధించిందా? అనే కోణంలో దర్యాప్తు సాగుతోంది. సామాన్యమైన నివాసంలో ఇంతటి సంపద దొరకడం పట్టణంలో చర్చనీయాంశంగా మారింది.