మిడిల్ ఈస్ట్‌లో ఉద్రిక్తతలు: పౌర విమానయాన శాఖ సమీక్ష.. హెల్ప్‌లైన్ నంబర్లు విడుదల

దిశ, డైనమిక్ బ్యూరో: మిడిల్ ఈస్ట్ (మధ్యప్రాచ్యం) ప్రాంతంలో కొనసాగుతున్న ఉద్రిక్త పరిస్థితుల ప్రభావం విమాన సర్వీసులపై తీవ్రంగా పడింది. భద్రతా కారణాల దృష్ట్యా ఈ ఒక్కరోజే భారత్ నుంచి నడవాల్సిన 357 విమానాలను రద్దు చేసినట్లు కేంద్ర పౌర విమానయాన శాఖ ప్రకటించింది. ప్రయాణికులకు ఎదురయ్యే ఇబ్బందులను ఎప్పటికప్పుడు పర్యవేక్షిస్తూ, వారికి ఊరట కల్పించేందుకు మంత్రిత్వ శాఖ ప్రత్యేక చర్యలు చేపట్టింది.

ఫిర్యాదుల పరిష్కారం..

విమానాల రద్దు, ప్రయాణ మార్పుల వల్ల తలెత్తుతున్న సమస్యలను పరిష్కరించడానికి 'ప్యాసింజర్ అసిస్టెన్స్ కంట్రోల్ రూమ్' (PACR) నిరంతరం పనిచేస్తోంది. ఇప్పటి వరకు ఎయిర్ సేవా (AirSewa), సోషల్ మీడియా వేదికలు, హెల్ప్‌లైన్ల ద్వారా అందిన 559 ఫిర్యాదులను అధికారులు పరిష్కరించారు. ఎయిర్‌లైన్స్ సంస్థలతో సమన్వయం చేసుకుంటూ ప్రయాణికులకు ప్రత్యామ్నాయ మార్గాలను చూపుతున్నట్లు మంత్రిత్వ శాఖ వెల్లడించింది.

ప్రయాణికులకు సూచనలు..

ప్రస్తుత సంక్షోభం నేపథ్యంలో ప్రయాణికులు తమ విమాన ప్రయాణాలకు సంబంధించి పలు సూచనలు పాటించాలని ప్రభుత్వం కోరింది. విమానాల రద్దు లేదా రీషెడ్యూలింగ్ సమాచారం కోసం సంబంధిత విమానయాన సంస్థల (Airlines) అధికారిక వెబ్‌సైట్లు లేదా యాప్‌లను మాత్రమే సంప్రదించాలి. అనవసర ఆందోళన చెందకుండా అధికారిక సమాచారంపైనే ఆధారపడాలి.

సాయం కోసం హెల్ప్‌లైన్ నంబర్లు..

విమాన ప్రయాణాలకు సంబంధించి ఏవైనా ఫిర్యాదులు లేదా సహాయం అవసరమైతే కేంద్ర పౌర విమానయాన శాఖ ఏర్పాటు చేసిన 011-24604283, 011 24632987 హెల్ప్‌లైన్ నంబర్లను సంప్రదించవచ్చు. పరిస్థితి చక్కబడే వరకు పౌర విమానయాన శాఖ ఈ వ్యవహారాన్ని నిశితంగా పర్యవేక్షిస్తూనే ఉంటుందని అధికారులు స్పష్టం చేశారు.