భారత్కు భారీ దెబ్బ.. చాబహార్ పోర్టుపై అమెరికా దాడి
దిశ, వెబ్ డెస్క్ : మధ్యప్రాచ్యంలో ఉద్రిక్తతలు అత్యంత ప్రమాదకర స్థాయికి చేరుకున్నాయి. వ్యూహాత్మకంగా ఎంతో కీలకమైన హర్మూజ్ జలసంధి (Strait of Hormuz) గుండా వెళ్లే అంతర్జాతీయ వాణిజ్య నౌకలపై ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) జరుపుతున్న దాడులను తిప్పికొట్టేందుకు.. అమెరికా సైన్యం ఇరాన్ భూభాగంపై అత్యంత భీకరమైన వైమానిక దాడులను (Air Strikes) ప్రారంభించింది. బుధవారం అర్ధరాత్రి దాటిన తర్వాత ఈ తాజా ఎయిర్ స్ట్రైక్స్ ప్రారంభమైనట్లు అమెరికా సెంట్రల్ కమాండ్ (US CENTCOM) అధికారికంగా వెల్లడించింది.
చబహార్ పోర్టుపై క్షిపణుల వర్షం.. భారీగా దెబ్బతిన్న నౌకాశ్రయం
ఇరాన్ అంతర్గత వర్గాల సమాచారం ప్రకారం.. ఈ తాజా దాడుల్లో భారతదేశ భాగస్వామ్యంతో ఎంతో ప్రతిష్టాత్మకంగా అభివృద్ధి చేయబడిన ఇరాన్లోని చబహార్ (Chabahar) నౌకాశ్రయం భారీగా దెబ్బతింది. చబహార్లోని పోర్ట్ అథారిటీ నియంత్రణ టవర్ (Control Tower), ఐఆర్జీసీకి చెందిన 'ఇమామ్ అలీ నెజ్దా' సైనిక స్థావరం, ఇటీవల ఆధునీకరించబడిన 'షాహిద్ బెహెష్తీ' (Shahid Beheshti) డాక్ ప్రాంతం, చబహార్ పోలీస్ డాక్లను లక్ష్యంగా చేసుకుని అమెరికా మిసైల్స్ విరుచుకుపడ్డాయి. ఈ దాడుల కారణంగా చబహార్ నగరంలోని దాదాపు సగానికి పైగా ప్రాంతాల్లో విద్యుత్ సరఫరా పూర్తిగా నిలిచిపోయింది. చబహార్తో పాటు బందర్ అబ్బాస్, కోనారక్, బుషెహర్, సిరిక్, క్విష్మ్ దీవులలోని ఇరాన్ సైనిక లక్ష్యాలపై అమెరికా బాంబుల వర్షం కురిపించింది. ఈ దాడుల్లో చబహార్ పోర్టు భారీగా ధ్వంసం అయినట్టు సమాచారం.
రంగంలోకి ఇరాన్ – ప్రతిదాడులు ప్రారంభం
మరోవైపు, గురువారం తెల్లవారుజాము నుంచే ఇరాన్ అనుకూల సైనిక వర్గాలు అమెరికా, ఇజ్రాయెల్ లక్ష్యాలపై భారీ ప్రతిదాడులను ప్రారంభించినట్లు ఇరాన్ అధికారిక మీడియా ఐఆర్ఐబీ (IRIB) పేర్కొంది. అంతకుముందు మంగళవారం రాత్రి అమెరికా జరిపిన దాడుల్లో ఇరాన్కు చెందిన 60 యుద్ధ బోట్లు, 80 సైనిక స్థావరాలు ధ్వంసమవడంతో.. ఇరాన్ క్షిపణులు, డ్రోన్ల ద్వారా కువైట్, బహ్రెయిన్లోని అమెరికా మిలిటరీ స్థావరాలను, ముఖ్యంగా మనామాలోని యూఎస్ 5వ ఫ్లీట్ (U.S. 5th Fleet) ప్రధాన కార్యాలయాన్ని టార్గెట్ చేసింది. ప్రస్తుత పరిణామాల నేపథ్యంలో, ఇరాన్ రానున్న రోజుల్లో పక్కనే ఉన్న గల్ఫ్ సహకార మండలి (GCC) దేశాలలోని కీలక చమురు, ఆర్థిక వనరులపై దాడులు చేసే అవకాశం ఉందని అంతర్జాతీయ రక్షణ రంగ విశ్లేషకులు ఆందోళన వ్యక్తం చేస్తున్నారు. తాత్కాలికంగా కుదిరిన శాంతి ప్రయత్నాలన్నీ విఫలమవడంతో మధ్యప్రాచ్యం మళ్లీ పూర్తిస్థాయి యుద్ధ ముంగిట్లోకి నెట్టబడింది.
