తెలంగాణలో మహిళా సాధికారతకు టాస్క్-సెర్ప్ ఒప్పందం

దిశ, తెలంగాణ బ్యూరో: రాష్ట్రవ్యాప్తంగా స్వయం సహాయక సంఘాల మహిళలకు నైపుణ్యాభివృద్ధి, డిజిటల్ అక్షరాస్యత, ఆర్థిక అవగాహన కల్పించి ఉపాధి అవకాశాలను పెంపొందించే లక్ష్యంతో తెలంగాణ అకాడమీ ఫర్ స్కిల్ అండ్ నాలెడ్జ్ (టాస్క్), సొసైటీ ఫర్ ఎలిమినేషన్ ఆఫ్ రూరల్ పావర్టీ (సెర్ప్) మధ్య అవగాహన ఒప్పందం (ఎంఓయూ) కుదిరింది. హైదరాబాద్‌లోని బీఆర్‌కేఆర్ భవన్‌లో జరిగిన ఈ కార్యక్రమంలో సెర్ప్ సీఈవో దివ్య దేవరాజన్, టాస్క్ సీఈవో కె.నితిన్ కుమార్‌రెడ్డి ఒప్పంద పత్రాలను పరస్పరం మార్చుకున్నారు. రాష్ట్రంలోని స్వయం సహాయక సంఘాల మహిళలను ఆర్థికంగా, సామాజికంగా మరింత బలోపేతం చేయాలనే ఉద్దేశంతో ఈ భాగస్వామ్యాన్ని ప్రారంభించినట్లు అధికారులు తెలిపారు.

ఈ ఒప్పందం ద్వారా మహిళలకు బ్యాంకింగ్ కరస్పాండెంట్ (బీసీ సఖి) సేవలకు అవసరమైన నైపుణ్యాలు, డిజిటల్ అక్షరాస్యత, ఆర్థిక అక్షరాస్యత, వ్యాపార నిర్వహణ, వ్యవస్థాపకత అభివృద్ధి, స్థిరమైన జీవనోపాధి అవకాశాలపై ప్రత్యేక శిక్షణలు అందించనున్నారు. ప్రస్తుతం డిజిటల్ సేవలు, ఆర్థిక లావాదేవీలు, స్వయం ఉపాధి అవకాశాలు వేగంగా విస్తరిస్తున్న నేపథ్యంలో గ్రామీణ మహిళలకు అవసరమైన జ్ఞానం, నైపుణ్యాలు అందించడం అత్యంత అవసరమని అధికారులు పేర్కొన్నారు. ఈ దిశగా టాస్క్ తన శిక్షణా నైపుణ్యాన్ని, సెర్ప్ తన విస్తృత గ్రామీణ నెట్‌వర్క్‌ను వినియోగించి మహిళలకు సమర్థవంతమైన శిక్షణ అందించనుంది.

ఈ కార్యక్రమం ద్వారా మహిళల్లో ఆత్మవిశ్వాసం పెంపొందడంతోపాటు ఆర్థిక స్వావలంబన సాధించేందుకు అవకాశాలు మెరుగుపడనున్నాయి. అలాగే డిజిటల్ సేవల వినియోగం పెరగడం, గ్రామీణ ప్రాంతాల్లో ఉపాధి, స్వయం ఉపాధి అవకాశాలు విస్తరించడం, కుటుంబాల ఆర్థికాభివృద్ధిలో మహిళల భాగస్వామ్యం మరింత బలపడడం వంటి ప్రయోజనాలు కలగనున్నాయని అధికారులు తెలిపారు. రాష్ట్రవ్యాప్తంగా టాస్క్ ప్రాంతీయ కేంద్రాల సహకారంతో ఈ కార్యక్రమాన్ని అమలు చేయనున్నట్లు వెల్లడించారు. మహిళల సమగ్ర అభివృద్ధి, ఆర్థిక సాధికారత, గ్రామీణ ఆర్థిక వ్యవస్థ బలోపేతానికి ఈ భాగస్వామ్యం కీలకంగా నిలుస్తుందని అధికారులు ఆశాభావం వ్యక్తం చేశారు.