సిరులు కురిపిస్తున్న "ఎర్ర బంగారం"

దిశ, వెబ్ డెస్క్ : వరంగల్‌లోని ఏనుమాముల వ్యవసాయ మార్కెట్ యార్డులో ప్రస్తుతం "ఎర్ర బంగారం" ధరలు సంచలనం సృష్టిస్తున్నాయి. మిర్చి ధరలు బంగారం వెండి ధరలతో పోటీ పడుతూ.. రైతులకు సిరులు కురిపిస్తున్నాయి. ఎర్ర బంగారం ధరలు అమాంతం పెరగడంతో రైతులు సంతోషం వ్యక్తం చేస్తున్నారు. ఫిబ్రవరి 2026కి సంబంధించిన తాజా సమాచారం ప్రకారం.. ఏనుమాముల మార్కెట్‌లో గత కొన్ని ఏళ్లలో ఎప్పుడూ లేని విధంగా నాణ్యమైన మిర్చి రకాల కోసం వ్యాపారులు పోటీ పడుతూ ఎక్కువ ధరలు చెల్లిస్తున్నారు. దేశీ రకం మిర్చి ఒక క్వింటాకు రూ. 41,200 ధర పలికింది. ఇది గత మూడు ఏళ్లలోనే అత్యధిక ధరగా నమోదైంది.

అంతేకాదు ఎల్లో మిర్చి(పసుపు రకం) అయితే ఏకంగా క్వింటాకు రూ. 44,000 ధరను తాకింది. అలాగే వండర్ హాట్ మిర్చి ధరలు కూడా ఒక్కరోజులోనే భారీగా పెరిగాయి. మంగళవారం నాడు క్వింటా వండర్ హాట్ మిర్చి ధర రూ. 32,000గా ఉండగా, బుధవారం ఒక్కరోజులోనే రూ. 5,000 పెరిగి రూ. 37,100కి చేరింది. ఇది గత నాలుగు ఏళ్లలో ఎప్పుడూ లేని ఆల్‌టైమ్ హైగా మార్కెట్ వర్గాలు చెబుతున్నాయి. ఇతర మిర్చి రకాల ధరలు కూడా గణనీయంగా పెరిగాయి. తేజ మిర్చి ధరలు ప్రస్తుతం క్వింటాకు రూ. 19,000 నుంచి రూ. 20,000 వరకు పలుకుతున్నాయి. మొత్తంగా చూస్తే అన్ని రకాల మిర్చి ధరలు పైకి ఎగబాకాయి. గత రెండు సంవత్సరాలుగా మిర్చి ధరలు పడిపోవడంతో రైతులు తీవ్రంగా ఇబ్బంది పడ్డారు. ఇప్పుడు ఒక్కసారిగా ధరలు పెరగడంతో రైతులు మంచి లాభాలు గడిస్తూ.. ఆనందం వ్యక్తం చేస్తున్నారు.

అయితే మిర్చి ధరలు ఇంతగా పెరగడానికి అంతర్జాతీయ మార్కెట్ల నుంచి, ముఖ్యంగా మసాలా కంపెనీల నుంచి భారీ డిమాండ్ రావడం ఒక పెద్ద కారణంగా కనిపిస్తున్నాయి. వండర్ హాట్ మిర్చికి ఉండే ఘాటు, మంచి రంగు వల్ల విదేశీ ఆర్డర్లు ఎక్కువగా వస్తున్నాయని వ్యాపారులు చెబుతున్నారు. మరోవైపు మధ్యప్రదేశ్‌తో పాటు ఇతర రాష్ట్రాల్లో ఈ ఏడాది మిర్చి సాగు విస్తీర్ణం తగ్గింది. పంట తక్కువగా రావడం వల్ల మార్కెట్‌లో సరఫరా తగ్గి, డిమాండ్ ఎక్కువగా ఉండటంతో ధరలు ఈ స్థాయిలో పెరిగాయి.

ఏనుమాముల వ్యవసాయ మార్కెట్ యార్డు ఆసియాలోనే అతిపెద్ద మిర్చి మార్కెట్లలో ఒకటిగా పేరుంది. ఇక్కడి ధరలే తెలంగాణతో పాటు ఇతర ప్రాంతాల మిర్చి రైతులకు ఒక ప్రమాణంగా మారుతాయి. ప్రస్తుతం కొనసాగుతున్న ఈ ధరల ట్రెండ్ ఇంకొంతకాలం కొనసాగితే, మిర్చి ధరల్లో మరిన్ని రికార్డులు నమోదయ్యే అవకాశముందని మార్కెట్ వర్గాలు అంచనా వేస్తున్నాయి. రైతులకు ఇది నిజంగా సంతోషకరమైన వార్త అని చెప్పడంలో ఎలాంటి సందేహం లేదు.