వెజ్ కు బదులు చికెన్.. స్విగ్గీ ఎండీకి నాన్‌ బెయిలబుల్‌ వారెంట్‌

దిశ, వెబ్ డెస్క్ : వినియోగదారుల ఫోరమ్ కమిషన్‌ ఇచ్చిన తీర్పును అమలు చేయకుండా కోర్టు ఆదేశాలను బేఖాతరు చేసిన ప్రముఖ ఫుడ్ డెలివరీ యాప్ 'స్విగ్గీ' (Swiggy) మేనేజింగ్ డైరెక్టర్ (MD)తో సహా ఇతర సిబ్బందికి జిల్లా వినియోగదారుల కమిషన్ గట్టి షాక్ ఇచ్చింది. కమిషన్ ఆదేశాలను లైట్ తీసుకున్నందుకు గానూ స్విగ్గీ ఎండీతో పాటు నలుగురు ప్రతివాదులకు నాన్‌ బెయిలబుల్‌ వారెంట్‌ (Non-Bailable Warrant) జారీ చేస్తూ సంచలన ఉత్తర్వులు ఇచ్చింది.

వెజ్ బిర్యానీలో చికెన్ ముక్కలు

కర్నూలు నగరానికి చెందిన ఒక వినియోగదారుడు గతేడాది డిసెంబరు నెలలో స్విగ్గీ యాప్‌ ద్వారా స్థానిక ఆర్‌ఎస్‌ రోడ్డులో ఉన్న 'న్యూ అప్సరా హోటల్‌' నుండి వెజ్‌ బిర్యానీని ఆర్డర్‌ చేశారు. అయితే తీరా పార్సిల్ ఓపెన్ చేసి చూసేసరికి, ఆ వెజ్ బిర్యానీలో చికెన్‌ ముక్కలు వచ్చాయి. శాకాహారి అయిన సదరు వినియోగదారుడు దీనివల్ల తీవ్ర మనస్తాపానికి గురయ్యారు. ఈ నిర్లక్ష్యంపై హోటల్, స్విగ్గీ యాజమాన్యం సరైన సమాధానం ఇవ్వకపోవడంతో, ఆయన న్యాయం కోసం జిల్లా వినియోగదారుల వివాదాల పరిష్కార కమిషన్‌ను ఆశ్రయించి ఫిర్యాదు చేశారు.

ఈ ఫిర్యాదుపై ఇరుపక్షాల వాదనలను విన్న వినియోగదారుల కమిషన్, వినియోగదారుడికి జరిగిన నష్టాన్ని, మానసిక క్షోభను తీవ్రంగా పరిగణించింది. స్విగ్గీ సంస్థ, హోటల్ నిర్వాహకుల తప్పు ఉన్నట్లు నిర్ధారించి.. గతేడాది డిసెంబరు 31వ తేదీన ఫిర్యాదుదారునికి నష్టపరిహారం కింద రూ.50 వేలు, కోర్టు ఖర్చుల కింద మరో రూ.5 వేలు (మొత్తం రూ.55,000) చెల్లించాలని స్విగ్గీ నిర్వాహకులను,ఇతర ప్రతివాదులను కమిషన్ ఆదేశించింది.

తీర్పు బేఖాతరు.. నాన్ బెయిలబుల్ వారెంట్లు

అయితే, కమిషన్ ఇచ్చిన గడువు ముగిసినప్పటికీ స్విగ్గీ యాజమాన్యం ఆ ఆదేశాలను అమలు చేయలేదు. దీనిపై కమిషన్ పలుమార్లు నోటీసులు జారీ చేసినా వారి నుంచి ఎలాంటి స్పందన రాలేదు. చివరగా, గురువారం నాటి విచారణకు ఖచ్చితంగా తమ ముందు హాజరుకావాలంటూ జారీ చేసిన నోటీసులను కూడా స్విగ్గీ ప్రతినిధులు బేఖాతరు చేశారు. కోర్టు ఆదేశాల పట్ల సంస్థ ప్రదర్శించిన ఈ నిర్లక్ష్య వైఖరిని కమిషన్ తీవ్రంగా పరిగణించి.. బెంగళూరులోని స్విగ్గీ ఎండీ, ఆ సంస్థ అసిస్టెంట్‌ వైస్‌ ప్రెసిడెంట్, బండ్ల టెక్నాలజీ ప్రైవేట్‌ లిమిటెడ్‌ గ్రీవెన్స్‌ ఆఫీసర్, న్యూ అప్సరా హోటల్‌ మేనేజర్‌లకు నాన్‌ బెయిలబుల్‌ వారెంట్లు జారీ చేసింది. తదుపరి విచారణ నిమిత్తం కేసును ఈ ఏడాది జూన్‌ 22వ తేదీకి వాయిదా వేస్తూ కమిషన్ నిర్ణయం తీసుకుంది.