NEET 2027 నిర్వహణలో భారీ మార్పులు!

దిశ, వెబ్ డెస్క్ : ఇటీవల వైద్య విద్యా కోర్సుల ప్రవేశ పరీక్ష 'నీట్' (NEET UG) ప్రశ్నాపత్రాల లీకేజీ, అవకతవకల వ్యవహారం దేశవ్యాప్తంగా తీవ్ర దుమారాన్ని రేపిన సంగతి తెలిసిందే. లక్షలాది మంది విద్యార్థులు, తల్లిదండ్రుల నుండి వ్యక్తమైన తీవ్ర నిరసనల నేపథ్యంలో కేంద్ర ప్రభుత్వం ఈ పరీక్ష నిర్వహణ తీరుపై కీలక నిర్ణయాలు తీసుకోబోతోంది. భవిష్యత్తులో ఇలాంటి పేపర్ లీకేజీలకు తావులేకుండా ఉండేందుకు వీలుగా పరీక్షా విధానాన్ని పూర్తిస్థాయిలో మార్చడానికి నేషనల్ టెస్టింగ్ ఏజెన్సీ (NTA), కేంద్ర ప్రభుత్వ వర్గాలు కసరత్తులు ప్రారంభించాయి.

5 నుండి 6 రోజుల పాటు పరీక్షలు

వచ్చే ఏడాది నుండి నీట్ యూజీ పరీక్షను సాంప్రదాయ పెన్-పేపర్ (OMR) పద్ధతికి స్వస్తి పలికి, పూర్తి కంప్యూటర్ ఆధారిత (Computer Based Test - CBT) పద్ధతిలో నిర్వహిస్తామని ఎన్‌టీఏ ఇప్పటికే ప్రకటించింది. అయితే తాజాగా అందుతున్న సమాచారం ప్రకారం, పరీక్షను ఒకే రోజు కాకుండా విడతల వారీగా నిర్వహించబోతున్నారు. దేశవ్యాప్తంగా సుమారు 500 నగరాల్లోని 1000కి పైగా అత్యాధునిక కేంద్రాలలో ఈ పరీక్షలను ఏర్పాటు చేయనున్నారు. ఒకేసారి కాకుండా దాదాపు 5 నుండి 6 రోజుల పాటు విడతల వారీగా నీట్ పరీక్ష సాగనుంది. ప్రతిరోజూ దాదాపు 5 లక్షల మంది విద్యార్థులు డిజిటల్ పద్ధతిలో పరీక్షకు హాజరయ్యేలా పటిష్టమైన మౌలిక వసతులను సిద్ధం చేస్తున్నారు.

అక్టోబర్ నాటికి పూర్తి ప్రక్షాళన

ప్రశ్నాపత్రాల లీకేజీకి బాధ్యత వహిస్తూ తీవ్ర విమర్శలు ఎదుర్కొంటున్న నేషనల్ టెస్టింగ్ ఏజెన్సీ (NTA) నిర్మాణంలో కూడా కేంద్ర ప్రభుత్వం సమూల మార్పులు చేయబోతోంది. సంస్థలోని ఉన్నతాధికారుల మార్పుతో పాటు, అంతర్గత భద్రతా లోపాలను సరిదిద్దడానికి ఉన్నత స్థాయి ప్రక్షాళన చర్యలు చేపట్టనున్నారు. ఈ పరిపాలనాపరమైన, సాంకేతికపరమైన ప్రక్షాళన ప్రక్రియలన్నింటినీ రానున్న అక్టోబర్ నాటికే పూర్తి చేయాలని కేంద్ర ప్రభుత్వ వర్గాలు గడువుగా పెట్టుకున్నాయి.

విద్యార్థులు, తల్లిదండ్రుల విన్నపం

కేంద్ర ప్రభుత్వం ఎన్ని మార్పులు చేసినప్పటికీ, భవిష్యత్తులో రాసే పరీక్షలైనా ఎటువంటి లీకేజీలు, అవకతవకలు, సాంకేతిక లోపాలు లేకుండా పారదర్శకంగా జరగాలని విద్యార్థి లోకం, తల్లిదండ్రులు ముక్తకంఠంతో కోరుతున్నారు. కష్టపడి చదివే విద్యార్థుల మెరిట్‌కు నష్టం కలగకుండా ప్రభుత్వం కఠినమైన నిఘా వ్యవస్థను ఏర్పాటు చేయాలని వారు విజ్ఞప్తి చేస్తున్నారు.