భారీ వర్షాలకు నదులుగా మారిన రోడ్లు.. చేపల కోసం ఎగబడ్డ స్థానికులు

దిశ, వెబ్ డెస్క్ : మహారాష్ట్రలో కురుస్తున్న భారీ వర్షాలు పూణే జిల్లాలోని తలేగావ్ దభాడే (Talegaon Dabhade) పట్టణం వరద నీటిలో చిక్కుకుంది. గత కొన్ని రోజులుగా ఎడతెరిపి లేకుండా కురుస్తున్న కుండపోత వర్షాల కారణంగా స్థానిక జలాశయాలు, చెరువులు ఉప్పొంగి ప్రవహించడంతో.. వరద నీరు భారీ ఎత్తున పట్టణంలోని ప్రధాన రహదారులపైకి, నివాస ప్రాంతాల్లోకి చేరింది. అయితే ఈ వరద నీటితో పాటు ఊహించని విధంగా భారీగా చేపలు కూడా కొట్టుకురావడం స్థానికులను తీవ్ర ఆశ్చర్యానికి గురిచేసింది. రోడ్లపై మోకాళ్ళ లోతులో ప్రవహిస్తున్న వరద నీటిలో వందల సంఖ్యలో చేపలు కనిపించడంతో ఆ ప్రాంతమంతా ఒక్కసారిగా కోలాహలంగా మారిపోయింది. రోడ్లపై చేపలు కొట్టుకొచ్చాయనే వార్త తెలియడంతో స్థానిక ప్రజలు, వాహనదారులు తమ పనులను పక్కనపెట్టి వాటిని పట్టుకోవడానికి పోటీ పడ్డారు. వయసుతో సంబంధం లేకుండా చిన్న పిల్లల నుండి పెద్దల వరకు అందరూ రోడ్లపైకి చేరి చేపల వేటలో పడ్డారు.

కొందరు తమ చేతులతోనే నేరుగా నీటిలోని చేపలను పట్టుకోవడానికి ప్రయత్నించగా.. మరికొందరు ఇళ్లలో ఉండే బకెట్లు, ప్లాస్టిక్ డబ్బాలు, గంపలు, ఇంప్రొవైజ్డ్ నెట్లు పట్టుకొని రోడ్లపై చెల్లాచెదురుగా పడుతున్న చేపలను ఏరుకుంటూ ఎంజాయ్ చేశారు. ఊహించని విధంగా భారీ సైజులో ఉచితంగా చేపలు దొరకడంతో స్థానికుల ఆనందానికి అవధులు లేకుండా పోయాయి. ఈ వింతైన దృశ్యాలను అక్కడున్న కొందరు తమ మొబైల్ ఫోన్లలో చిత్రీకరించి సోషల్ మీడియాలో పోస్ట్ చేశారు. రోడ్లపై వరద నీటిలో ప్రజలు ఉత్సాహంగా ఎగబడి చేపలు పడుతున్న వీడియోలు ప్రస్తుతం ఇంటర్నెట్‌లో విపరీతంగా హల్చల్ చేస్తున్నాయి. నెటిజన్లు ఈ వీడియోలపై రకరకాలుగా స్పందిస్తూ.. "పూణే రోడ్లు రాత్రికి రాత్రే ఉచిత ఫిష్ మార్కెట్‌గా మారిపోయాయి" అంటూ ఫన్నీగా కామెంట్లు పెడుతున్నారు.