అమెరికా సరిహద్దుల్లో పెరిగిన నిఘా: ప్రతి 20 నిమిషాలకు ఒక భారతీయుడు అరెస్ట్!

దిశ, వెబ్ డెస్క్: డొనాల్డ్ ట్రంప్ అమెరికా అధ్యక్షుడిగా రెండోసారి అధికారంలోకి వచ్చిన తర్వాత అక్రమ వలసలపై కఠిన చర్యల చేపట్టిన విషయం తెలిసిందే. యూఎస్ కస్టమ్స్ అండ్ బోర్డర్ ప్రొటెక్షన్ (US Customs and Border Protection) వెల్లడించిన తాజా నివేదిక ప్రకారం, 2025 జనవరి నుండి డిసెంబర్ మధ్య కాలంలో 23,830 మంది భారతీయులు అమెరికాలోకి అక్రమంగా ప్రవేశిస్తూ పట్టుబడ్డారు. దీనిని సగటున లెక్కగడితే, గత ఏడాది పొడవునా అమెరికా సరిహద్దుల్లో ప్రతి 20 నిమిషాలకు ఒక భారతీయుడు అరెస్టవుతున్నట్లు గణాంకాలు చెబుతున్నాయి. 2024 లో అరెస్టయిన భారతీయుల సంఖ్య 85,119తో పోలిస్తే, 2025 లో ఈ సంఖ్య భారీగా తగ్గినప్పటికీ, అక్రమంగా ప్రవేశించే వారి జాబితాలో భారత్ ఇప్పటికీ అగ్రస్థానాల్లో ఉండటం గమనార్హం.

ట్రంప్ ప్రభుత్వం అధికారంలోకి వచ్చిన తర్వాత సరిహద్దుల వద్ద నిఘా పెంచడం, 'మాస్ డిపోర్టేషన్' (సామూహిక బహిష్కరణ) వంటి విధానాలను వేగవంతం చేయడం ఈ మార్పుకు ప్రధాన కారణమని విశ్లేషకులు భావిస్తున్నారు. గతంలో ఎక్కువ మంది మెక్సికో సరిహద్దుల ద్వారా వచ్చే వారు కాగా, ఇప్పుడు అక్కడ నిఘా పెరగడంతో చాలామంది కెనడా-యూఎస్ సరిహద్దు వంటి ప్రమాదకర మార్గాలను ఎంచుకుంటున్నారు. దుబాయ్, ఇస్తాంబుల్ వంటి నగరాల మీదుగా సాగే 'డంకీ' (Dunki) రూట్లను కూడా భద్రతా దళాలు ప్రస్తుతం తీవ్రంగా అడ్డుకుంటున్నాయి.

అరెస్టవుతున్న వారిలో అత్యధికులు ఒంటరిగా వచ్చే యువకులే అయినప్పటికీ, తల్లిదండ్రులు లేకుండా ఒంటరిగా సరిహద్దులు దాటుతున్న చిన్న పిల్లల సంఖ్య కూడా పెరగడం ఆందోళన కలిగిస్తోంది. 2022లో కెనడా సరిహద్దులో గడ్డకట్టే చలికి ఒకే కుటుంబానికి చెందిన నలుగురు భారతీయులు మరణించిన 'డింగుచా' విషాదం వంటి సంఘటనలు జరిగినప్పటికీ చాలామంది ప్రాణాలకు తెగించి అక్రమ మార్గాల్లో అమెరికా వెళ్లే ప్రయత్నం చేస్తున్నారు. ప్రధానంగా గుజరాత్ వంటి రాష్ట్రాల నుంచి అమెరికాలో స్థిరపడాలనే ఆశతో యువత ఇమిగ్రేషన్ ఏజెంట్ల ఉచ్చులో పడి ఇలాంటి ప్రమాదకర ప్రయాణాలు చేస్తున్నట్లు నివేదికలు స్పష్టం చేస్తున్నాయి.