కేసీఆర్ ను కలిసిన హిమాన్షు స్నేహితులు.. ఫోటోలు వైరల్

దిశ, వెబ్ డెస్క్ : బీఆర్‌ఎస్ అధినేత, మాజీ ముఖ్యమంత్రి కేసీఆర్ మనుమడు హిమాన్షు రావు తన సోషల్ మీడియా ఖాతాలో షేర్ చేసిన ఫోటోలు ప్రస్తుతం నెట్టింట్లో విపరీతంగా ట్రెండ్ అవుతున్నాయి. విదేశాల్లో ఉన్నత చదువులు చదువుతున్న హిమాన్షు, ప్రస్తుతం సెలవుల కోసం తన విదేశీ స్నేహితులతో కలిసి తెలంగాణకు వచ్చారు. ఈ పర్యటనలో భాగంగా వారు రాష్ట్రంలోని కీలకమైన ఆధ్యాత్మిక, పరిపాలనా కేంద్రాలను సందర్శించారు. తెలంగాణ ఆవిర్భావ దినోత్సవం రోజున హిమాన్షు తన స్నేహితులను తీసుకుని ఎర్రవెల్లిలోని కేసీఆర్ ఫామ్‌హౌస్‌కు వెళ్లారు. అక్కడ తాత కేసీఆర్ పక్కన కూర్చొని, టీ తాగుతూ సరదాగా ముచ్చటించిన ఫోటోలను ఆయన పంచుకున్నారు. అలాగే ఈ సెలవుల పర్యటనలో భాగంగా హిమాన్షు తన స్నేహితులతో కలిసి ప్రసిద్ధ పుణ్యక్షేత్రమైన వేములవాడ శ్రీ రాజరాజేశ్వర స్వామి దేవాలయాన్ని సందర్శించి ప్రత్యేక పూజలు నిర్వహించారు.

ఆధ్యాత్మిక పర్యటనతో పాటు రాజధాని హైదరాబాద్‌లోని ఆధునిక ల్యాండ్‌మార్క్‌లను హిమాన్షు తన స్నేహితులకు చూపించారు. హుస్సేన్‌సాగర్ తీరాన ఉన్న అత్యంత ప్రతిష్టాత్మకమైన డా. బి.ఆర్. అంబేద్కర్ మహా విగ్రహాన్ని, అలాగే తెలంగాణ నూతన సెక్రెటేరియేట్ భవనాన్ని వారు సందర్శించి, అక్కడ గ్రూప్ ఫోటోలు దిగారు. తన స్నేహితులకు తెలంగాణ సంస్కృతిని, హైదరాబాద్ ప్రగతిని పరిచయం చేస్తూ, కుటుంబంతో సమయం గడపడంపై బీఆర్‌ఎస్ శ్రేణులు, నెటిజన్లు సామాజిక మాధ్యమాల్లో హర్షం వ్యక్తం చేస్తున్నారు.