TG : అంగన్వాడీల్లోనూ ఒంటిపూట బడులు
తెలంగాణలోని అన్ని అంగన్వాడీల్లో రేపటి నుంచి ఒంటిపూట బడులు నిర్వహించాలని రాష్ట్ర ప్రభుత్వం ఆదేశాలు జారీ చేసింది.
దిశ, వెబ్ డెస్క్ : తెలంగాణ రాష్ట్రవ్యాప్తంగా ఎండల తీవ్రత రోజురోజుకూ పెరుగుతుండటంతో ప్రభుత్వం మరో కీలక నిర్ణయం తీసుకుంది. గర్భిణులు, బాలింతలు, చిన్నారుల ఆరోగ్యాన్ని దృష్టిలో ఉంచుకుని అంగన్వాడీ కేంద్రాలను ఒంటిపూట మాత్రమే నిర్వహించాలని సర్కారు ఆదేశాలు జారీ చేసింది. సాధారణంగా పాఠశాల విద్యాశాఖ మార్చి 16 నుంచి ఒంటిపూట బడులను అమలు చేస్తున్నట్లే, అదే తరహాలో అంగన్వాడీలు కూడా ఇకపై ఉదయం వేళల్లోనే పనిచేయనున్నాయి. ఈ కొత్త నిబంధనలు ఏప్రిల్ 23 వరకు అమల్లో ఉంటాయని అధికారులు స్పష్టం చేశారు. మండుతున్న ఎండల కారణంగా మధ్యాహ్నం వేళ చిన్నారులు ఇంటికి వెళ్లడం ఇబ్బందికరంగా మారుతున్న నేపథ్యంలో ఈ నిర్ణయం తీసుకున్నట్టు పేర్కొన్నారు.
వేసవి సెలవులు.. పౌష్టికాహారం నిరంతరాయంగా పంపిణీ
ఒంటిపూట బడులు ఏప్రిల్ 23తో ముగియనుండగా, ఆ తర్వాత వేసవి తీవ్రతను బట్టి సుమారు నెలరోజుల పాటు వేసవి సెలవులను ప్రకటించే ఆలోచనలో ప్రభుత్వం ఉంది. దీనిపై మరికొన్ని రోజుల్లో అధికారిక ఉత్తర్వులు వెలువడే అవకాశం ఉంది. అయితే సెలవులు ప్రకటించినా చిన్నారులు, గర్భిణులకు అందాల్సిన పౌష్టికాహారంలో ఎటువంటి అంతరాయం కలగకుండా ప్రభుత్వం జాగ్రత్తలు తీసుకుంటోంది. అంగన్వాడీ కేంద్రాలకు వచ్చి భోజనం చేయలేని వారికి 'టేక్ హోమ్ రేషన్' (Take Home Ration - THR) పద్ధతిలో నేరుగా వారి ఇళ్లకే రేషన్ను చేరవేసే ప్రక్రియను మరింత పటిష్టం చేయనున్నారు. తద్వారా వేసవిలో కూడా పౌష్టికాహార పంపిణీ నిరంతరాయంగా కొనసాగుతుందని అధికారులు తెలిపారు.
