సీబీఎస్ఈ విప్లవాత్మక నిర్ణయం.. 12వ తరగతికి ‘ఆన్-స్క్రీన్ మార్కింగ్’

దిశ, వెబ్ డెస్క్: కేంద్ర మాధ్యమిక విద్యా బోర్డు (CBSE) విప్లవాత్మక నిర్ణయం తీసుకుంది. 2026 విద్యా సంవత్సరం నుంచి 12వ తరగతి సమాధాన పత్రాల దిద్దుబాటు కోసం ఆన్-స్క్రీన్ మార్కింగ్ (OSM) విధానాన్ని తిరిగి ప్రవేశపెట్టింది. ఫిబ్రవరి 17 నుంచి ప్రారంభం కానున్న పరీక్షల ఫలితాల ప్రక్రియలో మరింత వేగం, పారదర్శకత తీసుకురావడమే ఈ నిర్ణయం వెనుక ఉన్న ప్రధాన ఉద్దేశ్యం. ఈ విధానం ప్రకారం, విద్యార్థులు రాసిన ఫిజికల్ ఆన్సర్ షీట్లను స్కాన్ చేసి డిజిటల్ రూపంలోకి మారుస్తారు. అనంతరం ఉపాధ్యాయులు కంప్యూటర్ స్క్రీన్‌పైనే ఆ పత్రాలను మూల్యాంకనం చేస్తారు. మార్కుల లెక్కింపు (Totalling) సాఫ్ట్‌వేర్ ద్వారా ఆటోమేటిక్‌గా జరుగుతుంది.

ఈ నూతన విధానం వల్ల అనేక ప్రయోజనాలు ఉన్నాయని CBSE బోర్డు తెలిపింది. ముఖ్యంగా, మార్కుల లెక్కింపులో మనుషుల వల్ల జరిగే పొరపాట్లు (Manual Errors) పూర్తిగా తొలగిపోతాయి. దీనివల్ల ఫలితాల వెల్లడి తర్వాత విద్యార్థులు మళ్లీ రీ-వెరిఫికేషన్ (Re-verification) కోసం దరఖాస్తు చేసుకోవాల్సిన అవసరం గణనీయంగా తగ్గుతుంది. అంతేకాకుండా, పేపర్లను ఒక ప్రాంతం నుంచి మరొక ప్రాంతానికి తరలించే ఖర్చు, సమయం ఆదా అవుతుంది. ఉపాధ్యాయులు తమ సొంత పాఠశాలల్లోని కంప్యూటర్ ల్యాబ్‌ల నుండే ఈ ప్రక్రియలో పాల్గొనే వెసులుబాటు కల్పించబడింది.

కాగా ఈ మార్పు ప్రస్తుతం కేవలం 12వ తరగతికి మాత్రమే పరిమితం చేయబడింది. 10వ తరగతి సమాధాన పత్రాలను మాత్రం ఈ ఏడాది కూడా పాత పద్ధతిలోనే (భౌతికంగా) దిద్దనున్నారు. ఈ డిజిటల్ మార్పు (Digital transformation)కు అనుగుణంగా పాఠశాలలు తమ కంప్యూటర్ ల్యాబ్‌లను సిద్ధం చేసుకోవాలని, కనీసం 2 Mbps ఇంటర్నెట్ వేగం, నిరంతర విద్యుత్ సరఫరా ఉండేలా చూసుకోవాలని సీబీఎస్ఈ ఆదేశించింది. విద్యార్థులు తమ సమాధానాలను స్పష్టంగా రాయాలని, ఎందుకంటే స్కాన్ చేసిన కాపీలను స్క్రీన్‌పై చూసేటప్పుడు స్పష్టత ఉండటం అత్యంత ముఖ్యంగా తెలుస్తుంది.