బాక్సాఫీస్ వద్ద సన్నీడియోల్ గర్జన.. ధురంధర్ రికార్డును బ్రేక్ చేసిన ‘బోర్డర్-2’!

దిశ, సినిమా: చాలాకాలం తర్వాత వెండితెరపై ‘బోర్డర్’ మ్యాజిక్ మళ్ళీ రిపీట్ అయ్యింది. సన్నీడియోల్(Sunny Deol) ప్రధాన పాత్రలో, అనురాగ్ సింగ్ దర్శకత్వంలో తెరకెక్కిన ‘బోర్డర్ 2’ (Border- 2)బాక్సాఫీస్ వద్ద సునామీ సృష్టిస్తోంది. 1971 భారత్-పాక్ యుద్ధ నేపథ్యంలో సాగే ఈ చిత్రం, గణతంత్ర దినోత్సవ వీకెండ్‌ను సంపూర్ణంగా వినియోగించుకునేందుకు జనవరి 23న థియేటర్స్‌లోకి వచ్చింది. ఈ సినిమా మొదటి రోజే దేశవ్యాప్తంగా ₹30 కోట్ల వసూళ్లను సాధించి సంచలనం సృష్టించింది. అంతేకాకుండా గత ఏడాది డిసెంబర్‌లో రణవీర్ సింగ్ (Ranveer Singh)నటించిన ‘ధురంధర్’ (Dhurandhar) సృష్టించిన ₹28 కోట్ల రికార్డును ఈ యుద్ధ ప్రాతిపదికన రూపొందిన చిత్రం ‘బోర్డర్-2’ బద్దలు కొట్టింది. మొదటిరోజేరూ. 32.10కోట్లు రాబట్టింది.

ఇక సినిమా రివ్యూల విషయానికొస్తే, విమర్శకుల నుండి ప్రేక్షకుల నుండి మిక్స్‌డ్ టాక్ లభించినప్పటికీ, మెజారిటీ జనం దేశభక్తి భావనతో థియేటర్లకు క్యూ కడుతున్నారు. సన్నీడియోల్ తన డైలాగ్ డెలివరీతో ఆకట్టుకోగా, దిల్జిత్ దోసాంజ్ తన నటనతో సినిమాకే హైలైట్‌గా నిలిచారని నెటిజన్లు ప్రశంసిస్తున్నారు. వరుణ్ ధావన్, అహాన్ శెట్టి, మేధా రాణా తమ పాత్రలకు న్యాయం చేసినా, 1997 నాటి ఒరిజినల్ ‘బోర్డర్’ ఎమోషన్ లెవల్స్‌ను ఇది అందుకోలేకపోయిందనే అభిప్రాయాలు కూడా వ్యక్తమవుతున్నాయి. అయినప్పటికీ కొందరు మాత్రం ‘బోర్డర్-2’ 2026లో తొలి బిగ్గెస్ట్ బ్లాక్‌బస్టర్‌గా నిలవడం ఖాయమని అభిప్రాయాలు వ్యక్తం చేస్తున్నారు.