సీజేఐకి కనీస మర్యాద ఇవ్వరా? : మహా సర్కారుపై మండిపడ్డ చాడ వెంకట్ రెడ్డి

దిశ, తెలంగాణ బ్యూరో : సుప్రీంకోర్టు ప్రధాన న్యాయ మూర్తి విషయంలో మహారాష్ట్ర ప్రభుత్వం తీరు సరికాదని సీపీఐ జాతీయ కార్యవర్గ సభ్యులు చాడ వెంకట్ రెడ్డి అన్నారు. సోమవారం హిమాయత్​నగర్​మగ్ధూం భవన్ లో ఆయన మీడియా తో మాట్లాడుతూ సుప్రీంకోర్టు ప్రధాన న్యాయమూర్తి జస్టిస్ గవాయ్ తన సొంత రాష్ట్రమైన మహారాష్ట్ర కు వచ్చినప్పుడు ఆ రాష్ట్ర ప్రభుత్వం కనీస మర్యాదలు చేయకపోవడం ప్రజాస్వామ్య విలువలను పాతరేయడమే అవుతుందన్నారు. ఇది ప్రజాస్వామ్య విలువలకు విరుద్ధమని చాడ అన్నారు. సుప్రీం కోర్టు న్యాయమూర్తి ఈ విషయంలో మానసిక వేదనకు గురయ్యారని , రాజ్యాంగంలో ప్రధానమైన న్యాయవ్యవస్థ పట్ల మహారాష్ట్ర ప్రభుత్వం అనుసరిస్తున్న తీరు నిర్లక్ష్యానికి అద్దం పడుతున్నదని అన్నారు. శాసన, కార్యనిర్వహణ, న్యాయ వ్యవస్థలు రాజ్యాంగంలో ప్రధాన అంగాలుగా పిలవబడుతాయని చాడ గుర్తు చేస్తూ ఈ మూడింటినీ పరస్పరం గౌరవించుకోవాలన్నారు.

ఇప్పటికైనా కేంద్ర ప్రభుత్వం కూడా రాష్ట్రాలకు ఈ విషయంలో తగిన సూచనలు ఇవ్వాలని సిపిఐ జాతీయ కార్యవర్గ సభ్యులు చాడ వెంకట్ రెడ్డి డిమాండ్​చేశారు. కాగా, హైదరాబాదు చార్మినార్ సమీపాన గల గుల్జార్ హౌస్ లో జరిగిన అగ్ని ప్రమాదంలో 17 మంది మృత్యువాత పడడం తనను తీవ్రంగా కలసి వేసిందని చాడా వెంకటరెడ్డి ఆవేదన వ్యక్తం చేశారు. ఈ సంఘటన బాధాకరమైందని , చనిపోయిన వారికి సంతాపాన్ని తెలియజేశారు. మృతి చెందిన కుటుంబాలకు 20 లక్షల ఎక్స్​గ్రేషియో చెల్లించాలని ప్రభుత్వాన్ని చాడ డిమాండ్​చేశారు. ఇలాంటి ఘటనలు పునరావృతం కాకుండా రాష్ట్ర ప్రభుత్వం చర్యలు చేపట్టాలని కోరారు.