ప్రెస్ కౌన్సిల్ పేరును వ్యక్తులు, సంస్థలు వాడరాదు : కౌన్సిల్ ఆదేశాలు

దిశ , తెలంగాణ బ్యూరో : ప్రెస్ కౌన్సిల్ పేరును వ్యక్తులు, సంస్థలు ఉపయోగించరాదని ప్రెస్ కౌన్సిల్ ఆఫ్ ఇండియా సెక్రటరీ శుభా గుప్త స్పష్టం చేశారు. ప్రెస్​కౌన్సిల్​కు ఏ రాష్ట్రంలో కూడా బ్రాంచి లేదన్నారు. ప్రెస్​కౌన్సిల్​కార్యాలయం దేశ రాజధాని న్యూ ఢిల్లీ లోని లోధి రోడ్ సీజీఓ కాంప్లెక్స్​లో ఉన్న సూచనా భవన్​లో మాత్రమే ఉన్నదని గమనించాలన్నారు. ప్రెస్​కౌన్సిల్​ పేరును స్థానిక సంస్థలు, ప్రభుత్వ అసోసియేషన్లు వినియోగించకుండా తగు చర్యలు తీసుకోవాలని, ఈ మేరకు ఉత్తర్వులు జారీచేయాలని అన్ని రాష్ట్రాల సీఎస్​లకు శుభా గుప్త లేఖ రాశారు.

ప్రెస్​కౌన్సిల్​పేరు గానీ, ప్రెస్​ కౌన్సిల్​సూచించినట్లు గానీ పేర్లను వినియోగించుకునే అనుమతి ఎవరికి ఇవ్వలేదని ఆ లేఖలో స్పష్టం చేశారు. కేంద్ర ప్రభుత్వ అనుమతి లేకుండా ఏ ఇతర సంస్థ కూడా ప్రెస్ కౌన్సిల్​పేరును వినియోగించరాదని ఇప్పటికే కేంద్ర న్యాయ వ్యవహారాల మంత్రిత్వ శాఖ కూడా అభిప్రాయ పడిన విషయాన్ని సీఎస్​లకు శుభా గుప్తా గుర్తు చేశారు. ప్రెస్​కౌన్సిల్​పేరును ఇతరులు వాడితే సంస్థ ప్రతిష్టకు భంగం కలిగించినట్లే అవుతుందని ఆయన స్పష్టం చేశారు.