పదోన్నతుల పల్లకి.. కానీ లేవని ఊరేగింపు..! ఒకే పోస్టులో 20 ఏళ్లు..

దిశ, హైదరాబాద్ బ్యూరో : పాఠశాల విద్యాశాఖలో గ్రేడ్-2 ప్రధానోపాధ్యాయుల (జీహెచ్ఎం) పదోన్నతులు చాలా కాలంగా పెండింగ్‌లో ఉండటంతో ప్రభుత్వ పాఠశాలల్లో విద్యార్థులకు సమర్థవంతమైన బోధన అందడం లేదు. ప్రస్తుతం పాఠశాలల్లో విధులు నిర్వహిస్తున్న స్కూల్ అసిస్టెంట్లకు ఇన్‌చార్జ్ హెడ్‌మాస్టర్లుగా బాధ్యతలు అప్పగించడం వల్ల వారు బోధనతో పాటు పరిపాలనా బాధ్యతలతో ఇబ్బందులు ఎదుర్కొంటున్నారు.

గ్రేడ్-2 హెడ్‌మాస్టర్లుగా స్కూల్ అసిస్టెంట్లకు పదోన్నతులు ఇవ్వాలన్న ఫైలును అధికారులు ఎన్నిసార్లు సిద్ధం చేసినా, "మాకు బదిలీలు పూర్తయ్యాకే పదోన్నతులు ఇవ్వాలి" అని కొంతమంది హెడ్‌మాస్టర్లు నిరసనలు చేపట్టడం, కోర్టులకు వెళ్లాలని బెదిరించడం వల్ల ప్రక్రియ ముందుకు సాగటం లేదు. దీంతో వందలాది మంది స్కూల్ అసిస్టెంట్లు పదోన్నతులు పొందకముందే పదవీ విరమణ చేయాల్సిన పరిస్థితి ఏర్పడింది.

ఎంఈఓలుగా హెడ్‌మాస్టర్ల బాధ్యతలు.. పాఠశాలలపై ప్రభావం

రెగ్యులర్ ఎంఈఓలు లేని మండలాల్లో హెడ్‌మాస్టర్లకే ఇన్‌చార్జ్ ఎంఈఓ బాధ్యతలు అప్పగించడం వల్ల వారు తమ పాఠశాలలకు హాజరు కావడంలో తేడాలు వస్తున్నాయి. దీని ప్రభావం విద్యార్థులపై తీవ్రంగా పడుతోంది. సీఎం రేవంత్ రెడ్డి అధికారంలోకి వచ్చిన తర్వాత ఉపాధ్యాయ బదిలీలు, పదోన్నతుల విషయంలో సంస్కరణలకు శ్రీకారం చుట్టారు. గతంలో పెండింగ్‌లో ఉన్న ఉపాధ్యాయుల బదిలీలు, పదోన్నతులను సమర్థవంతంగా నిర్వహించి ఉపాధ్యాయుల విశ్వాసాన్ని సంపాదించారు.

ప్రమోషన్లపై కుట్రలు.. అర్హుల నిరసన

2023 సెప్టెంబరు మల్టీ జోన్-1, 2024 జూన్‌లో మల్టీ జోన్-2లో ప్రమోషన్లు పొందిన హెడ్‌మాస్టర్లు తమకు ముందుగా బదిలీలు ఇవ్వాలని ఒత్తిడి చేయడంతో గ్రేడ్-2 హెడ్‌మాస్టర్ పదోన్నతులు నిలిచిపోయాయి. ప్రభుత్వం సాధారణ బదిలీలపై నిషేధం విధించినా, కనీసం రెండు సంవత్సరాలు ఒకే స్కూల్‌లో పని చేయాలని నిబంధన ఉన్నా కొందరు హెచ్‌ఎంలు తమ లాభం కోసం నిబంధనలను ధిక్కరించడంపై స్కూల్ అసిస్టెంట్లు మండిపడుతున్నారు.

అర్హులైన వారికి వెంటనే ప్రమోషన్లు ఇవ్వాలి

2023లో జరిగిన కౌన్సెలింగ్ సమయంలో కొన్ని ఖాళీలు, నాన్-జాయినింగ్ వల్ల ఉన్నా కూడా అర్హులైనవారికి పదోన్నతులు ఇవ్వలేదు. గత 20 సంవత్సరాలుగా స్కూల్ అసిస్టెంట్‌గా పని చేస్తున్న ఉపాధ్యాయులు ఇప్పుడు గ్రేడ్-2 హెడ్‌మాస్టర్ పదోన్నతులను కోరుతున్నారు. విద్యార్థులకు మెరుగైన బోధన అందించాలంటే, అర్హులకు వెంటనే ప్రమోషన్లు కల్పించాల్సిన అవసరం ఉందని వారు ప్రభుత్వాన్ని విజ్ఞప్తి చేస్తున్నారు.

స్కూల్ అసిస్టెంట్ ఎండీ నజీమొద్దీన్ మాట్లాడుతూ.. "బదిలీ అనేది సౌకర్యం కానీ, పదోన్నతి అనేది హక్కు. గతంలో పలుమార్లు బదిలీలు లేకుండానే పదోన్నతులు ఇచ్చారు. కొన్ని ఉపాధ్యాయ సంఘాలు నిబంధనలకు విరుద్ధంగా రెండేళ్ల సర్వీసు లేకుండానే బదిలీలు కోరుతూ ప్రభుత్వంపై ఒత్తిడి తేవడం అన్యాయమని భావిస్తున్నాం. బదిలీలు జరిగేవరకు ప్రమోషన్లు ఇవ్వకూడదనడం అనైతికం. చాలా మంది స్కూల్ అసిస్టెంట్లు పదోన్నతులు పొందకుండానే రిటైర్ కావడం బాధాకరం. ఈ విషయంలో సీఎం స్వయంగా విద్యాశాఖを見る కాబట్టి వెంటనే నిర్ణయం తీసుకుని అర్హులైనవారికి గ్రేడ్-2 హెడ్‌మాస్టర్ పదోన్నతులు కల్పించాలి."