ఔటర్ రీజినల్ రింగ్ రైల్వే లైన్ ప్రాజెక్టుపై లోక్‌సభలో ఎంపీ చామల కీలక డిమాండ్

దిశ, తెలంగాణ బ్యూరో : ఔటర్ రీజినల్ రింగ్ రైల్వే లైన్ ప్రాజెక్టును వేగవంతం చేయడానికి అవసరమైన చర్యలు తీసుకోవాలని భువనగిరి ఎంపీ చామల కిరణ్ కుమార్ రెడ్డి డిమాండ్ చేశారు. ఈ ప్రాజెక్ట్ హైదరాబాద్ చుట్టూ దాదాపు 400 కిలోమీటర్లు విస్తరించి .. సుమారు ఎనిమిది జిల్లాలను మరియు 14 మండలాలను కవర్ చేస్తోంది..దాదాపు 5 రైల్వే ఓవర్ బ్రిడ్జిలు, రైల్వే ఫ్లై ఓవర్లు ఉన్నాయి..అంచనా వ్యయం సుమారు రూ.12వేల కోట్లు.. ఇది రాబోయే ఔటర్ రీజినల్ రింగ్ రోడ్డుకు సమాంతరంగా హైదరాబాద్‌ నగరాన్ని విస్తరిస్తుందని చామల కిరణ్ కుమార్ రెడ్డి తెలిపారు. మంగళవారం ఆయన లోక్ సభలో మాట్లాడుతూ తెలంగాణ లాజిస్టిక్స్ మరియు మొబిలిటీ పర్యావరణ వ్యవస్థను పెంచడానికి భవిష్యత్తు అవసరాలను తీర్చడానికి రాష్ట్రంలో దాదాపు 60% పట్టణీకరణకు దారితీస్తుందని, ఉద్యోగ కల్పన మరియు ఆ ప్రాంతంలో పారిశ్రామిక వృద్ధిని వేగవంతం చేసి వికసిత భారత్-2047 గా మారడానికి సహాయపడుతుందన్నారు. ఈ అంశాన్ని వేగవంతం చేయడానికి రైల్వే మంత్రి సహకరించాలని కిరణ్ కుమార్ రెడ్డి కోరారు.

ఈ రింగ్ రైల్ ప్రాజెక్ట్ ఆర్థిక కార్యకలాపాలను, ఐటీ హబ్‌లను, ఫార్మాస్యూటికల్ క్లస్టర్‌లను, లాజిస్టిక్ పార్కులు, అభివృద్ధి చెందుతున్న పట్టణ వృద్ధి కేంద్రాలను సృష్టిస్తుందని, రాష్ట్ర వ్యాప్తంగా కొత్త వృద్ధి కారిడార్‌లను ఏర్పాటు చేయడానికి ఉపయోగపడుతుందన్నారు. ఇండిగో విమానాల రద్దుపై చామల కిరణ్ కుమార్ రెడ్డి మాట్లాడుతూ ఇండిగో పరిస్థితిని తట్టుకుంటోందని, కొన్ని రోజుల్లో సాధారణ పనితీరులోకి వస్తుందని పౌర విమానయాన మంత్రి చెప్పడానికి ప్రయత్నిస్తున్నారని, ఇప్పటివరకు ఇండిగోతో వ్యవస్థ ఎక్కడ తప్పు జరిగిందో ఇండిగోపై ఎలాంటి చర్య తీసుకోవాలో ఆయన స్పష్టంగా వివరించలేదని ఢిల్లీలో మీడియాతో మాట్లాడుతూ ఆయన అన్నారు. విమాన ఛార్జీలను క్రమబద్ధీకరించడానికి ఏదైనా యంత్రాంగం అమల్లోకి వస్తుందో లేదో కూడా ఆయన సమాధానం ఇవ్వలేదని, లేకపోతే ఈ దేశ ప్రజలను విమానయాన సంస్థలు మళ్లీ మళ్లీ దోపిడీ చేస్తాయని కిరణ్ కుమార్ రెడ్డి ఆందోళన వ్యక్తం చేశారు. ప్రధాన సమస్యలకు సమాధానం ఇవ్వలేదని, ప్రజలకు సరైన సమాధానం కావాలని తాము కోరుకున్నందున సభ నుంచి వాకౌట్ చేసినట్లుగా ఆయన తెలిపారు.