హార్వర్డ్ లో చివరి రోజు.. విద్యార్థుల బృందలతో రేవంత్ రెడ్డి భేటీ

దిశ, డైనమిక్ బ్యూరో: అమెరికా పర్యటనలో ఉన్న సీఎం రేవంత్ రెడ్డి (Revanth Reddy) ప్రఖ్యాత హార్వర్డ్ యూనివర్సిటీ (Harvard University) లో లీడర్ షిప్ కోర్సు పూర్తి చేసిన సంగతి తెలిసిందే. ఈ నెల 25 నుంచి 30 వరకు ‘లీడర్‌షిప్‌ ఫర్‌ ది ట్వంటీ ఫస్ట్‌ సెంచరీ’ పేరిట నిర్వహించిన తరగతులకు ఆయన హాజరయ్యారు. తన అధికారిక కార్యక్రమాల చివరి రోజు సందర్భంగా ఇవాళ సీఎం రేవంత్ రెడ్డి హార్వర్డ్ యూనివర్సిటీలో వివిధ ప్రతినిధి బృందాలతో భేటీ అయ్యారు. హార్వర్డ్ విశ్వవిద్యాలయానికి చెందిన వివిధ పాఠశాలల విద్యార్థులు, పూర్వ విద్యార్థులతో పాటు, మసాచుసెట్స్ ఇన్‌స్టిట్యూట్ ఆఫ్ టెక్నాలజీ (MIT), కొలంబియా విశ్వవిద్యాలయం వంటి ప్రముఖ విద్యాసంస్థల విద్యార్థులు, అలుమ్నీలతోనూ సీఎం సమావేశమయ్యారు.ఈ సందర్భంగా ఈ సమావేశాల్లో నాయకత్వం, విజయానికి సంబంధించిన అంశాలు, ఆర్థిక వృద్ధి, అభివృద్ధి నమూనాలు, సుస్థిరత, పర్యావరణ సవాళ్లు, రైతులు–మహిళలు–యువతకు సంక్షేమ విధానాలు వంటి అంశాలపై విస్తృత చర్చించారు.

ఆ పాత్ర నేను ధరించదలుచుకోలేదు:

ముఖ్యమంత్రి పరిపాలనపై తన దృక్పథాన్ని మార్పు దిశగా నాయకత్వం వహించడంలో ఉన్న సవాళ్లతో పాటు తన దీర్ఘకాలిక విజన్ TelanganaRising2047 కోర్ పిల్లర్లను వివరించారు. సమగ్ర వృద్ధి, భాగస్వామ్య భాగస్వామ్యం (స్టేక్‌హోల్డర్ పార్టిసిపేషన్), శక్తివంతీకరణ ఆధారిత అభివృద్ధికి ఈ విజన్ కల్పించే అవకాశాలను ఆయన వివరించారు. ఈ సందర్భంగా ఒక విద్యార్థుల బృందం తమకు నాయకత్వం గురించి బోధించాలని కోరగా అందుకు హార్వర్డ్ ప్రొఫెసర్లే ఉత్తములు అని ఈ విషయంలో తాను మోసపూరిత ప్రొఫెసర్ పాత్రను ధరించదలుచుకోలేదని సీఎం రేవంత్ సరదాగా వ్యాఖ్యానించారు. పరస్పర సంభాషణ, అనుభవాల పంచుకోవడం, పరస్పర అధ్యయనం ఆధారంగా జరిగే సార్థక ద్విముఖ చర్చలకే తాను ప్రాధాన్యం ఇస్తానని తెలిపారు.

తెలంగాణ రైజింగ్ బ్రాండ్ అంబాసిడర్లుగా మారండి:

దేశభవిష్యత్తుకు తెలంగాణ, హైదరాబాద్ ఆదర్శంగా నిలుస్తోందని భారతదేశంతో అనుసంధానం పెంచుకొని పనిచేయాలని విద్యార్థులకు సీఎం పిలుపునిచ్చారు. “తెలంగాణ రైజింగ్ బ్రాండ్ అంబాసిడర్లుగా మారండి” అని విద్యార్థులకు ఈ సందర్భంగా సీఎం పిలుపునిచ్చారు. సీఎం పిలుపుపై సానుకూలంగా స్పందించిన విద్యార్థులు తెలంగాణ అభివృద్ధి పథంలో తమ నైపుణ్యాన్ని, శక్తిసామర్థ్యాన్ని వినియోగించేందుకు సిద్ధంగా ఉన్నామని రాష్ట్ర గ్లోబల్ ప్రతిష్ఠను మరింత బలోపేతం చేయడానికి కట్టుబడి ఉన్నట్లు తెలిపారు.