అప్పన్నపేట ఐకెపి సెంటర్ లో దొంగల బీభత్సం...

దిశ, పెద్దపల్లి : పెద్దపల్లి మండలంలోని అప్పన్నపేట ఇందిరా క్రాంతి పథకం (ఐకెపి) సెంటర్లో దారుణమైన దొంగతనం జరిగింది. గురువారం రాత్రి కొందరు గుర్తుతెలియని దుండగులు రైతు పెరుక రాజు పంట కల్లంపై పడ్డారు. ఆరుగాలం శ్రమించి పండించిన సుమారు ఐదు బస్తాల విలువైన వడ్లను వారు అపహరించుకుపోయారు. ఈ సంఘటనతో తీవ్రంగా కలత చెందిన రైతు పెరుక రాజు తన గోడును వెళ్లబోసుకున్నాడు. కంటికి రెప్పలా కాపాడుకున్న పంటను దొంగలు ఎత్తుకుపోవడంతో అతడు దిక్కుతోచని స్థితిలో ఉన్నాడు. ఇలాంటి ఘటనలు పునరావృతం కాకుండా చూడాలని ఆయన అధికారులను వేడుకుంటున్నాడు. ముఖ్యంగా, అప్పన్నపేట ఐకెపి సెంటర్‌లో భద్రతా చర్యలు శూన్యంగా ఉన్నాయని ఆయన ఆవేదన వ్యక్తం చేశాడు. వెంటనే ఇక్కడ సీసీ కెమెరాలు ఏర్పాటు చేయాలని, రాత్రి వేళల్లో కాపలాదారుని నియమించాలని ఆయన గట్టిగా డిమాండ్ చేస్తున్నాడు. తద్వారా భవిష్యత్తులో ఇలాంటి నష్టాలు జరగకుండా ఉంటాయని ఆయన ఆశాభావం వ్యక్తం చేశాడు.