కోట్లు విలువ చేసే ప్రభుత్వ భూమి పై అక్రమ నిర్మాణం.. కోర్టు స్టే నడుస్తుండగానే పనులు..!

దిశ, తాండూరు : భూ అక్రమణదారుల ఆగడాలకు అడ్డూ అదుపు లేకుండా పోతోంది. తాండూరు పట్టణం నడిబొడ్డులో ఉన్న రూ. 10 కోట్ల విలువ చేసే ప్రభుత్వ స్థలం అన్యాక్రాంతమవుతోంది. సర్వేనంబర్‌ 111లో గల విజయ విద్యాలయ హైస్కూల్‌కు ఆనుకొని సుమారు 2 వేల గజాల ప్రభుత్వం భూమి ఉంది. గతంలో పాఠశాలకు ఆట స్థలం కోసం ప్రభుత్వం ఆ భూమిని ఇచ్చింది. అయితే ఈ భూమిపై వివాదం నెలకొనడంతో కోర్టులో కేసు నడుస్తోంది. కోర్టు ఆదేశాల మేరకు సంబంధిత అధికారులు అటు వైపు రాలేకపోతున్నారు. దీంతో పట్టణానికి చెందిన ఓ వ్యక్తి అధికార పార్టీ నాయకుల అండదండలతో కోట్లు విలువ చేసే ఈ భూములు షెడ్ నిర్మిస్తున్నారు. అక్కడ చురుకుగా పనులు సాగుతున్నాయి.

ప్రభుత్వ సూచిక బోర్డు మాయం.

ఈ భూమిలో గతంలో రెవెన్యూ అధికారులు ‘ఇది ప్రభుత్వ భూమి’ అని సూచిక బోర్డు ఏర్పాటు చేశారు. ప్రస్తుతం ఆ బోర్డు ఆ స్థలంలో కనిపించడం లేదు. అక్కడ చురుకుగా నిర్మాణ పనులు సాగుతున్నాయి. సర్కారు భూమి అన్యాక్రాంతమవుతున్నా సంబంధిత అధికారులు చోద్యం చూస్తుందన్న విమర్శలు వెల్లువెత్తుతున్నాయి.

మరో మారు కోర్టు ఆశ్రయించిన నిర్వాహకులు

ప్రభుత్వం గతంలో పాఠశాలకు ఆట స్థలం కోసం వాడుకోవాలని ఆ భూమిని ఇచ్చింది. అయితే ఆ భూమి తమదని, తామే హక్కుదారులమని 2015 సంవత్సరంలో విజయ విద్యాలయ హైస్కూల్‌ యాజమాన్యంలోని కొందరు వ్యక్తులు ముందుకు వచ్చారు. ఆ స్థలాన్ని స్వాధీనం చేసుకొని ప్లాట్లుగా చేసి విక్రయించే యత్నం చేశారు. పూర్వవిద్యార్థులు, స్థానికులు కల్పించుకొని కోర్టును ఆశ్రయించడంతో అప్పట్లోనే హైకోర్టు పర్మినెంట్‌ స్టే ఇచ్చింది. రెవెన్యూ అధికారులు అది ప్రభుత్వ స్థలమని తేల్చేశారు. అయితే ఈ భూమిపై గత కొంతకాలంగా కోర్టులో కేసు కొనసాగుతోంది. కోర్టులో కేసు ఉండగానే జేసీబీ యంత్రాలతో షెడ్ కోసం నిర్మాణాల పనులు చేపట్టడంతో ఈ భూవివాదం మళ్లీ తెరపైకి వచ్చింది. దీంతో స్కూల్ కమిటీ నిర్వాహకులు, మాజీ కౌన్సిలర్లు మరో మారు కోర్టు ఆశ్రయించినట్లు సమాచారం.

ప్రభుత్వ తరపున పిటిషన్ వేశాం.

ఈ భూమి కోసం కోర్టులో మళ్లీ పిటిషన్ వేశాం. త్వరలోనే కోర్టు ఆదేశాలు వస్తాయి. కోర్టు ఉత్తర్వుల మేరకు చర్యలు తీసుకుంటాం. ఈ విషయంలో తదుపరి చర్యలు మీడియాకు తెలియజేస్తాం

- తారాసింగ్, తాండూరు తహసీల్దార్