సీఎం రేవంత్‌తో గోదావరి బోర్డు చైర్మన్ భేటీ.. జల వనరుల వినియోగంపై చర్చ

దిశ, వెబ్‌డెస్క్: సీఎం రేవంత్ రెడ్డి (CM Revanth Reddy)తో గోదావరి నది యాజమాన్య బోర్డు (GRMB) చైర్మన్ పి.దోర్జీ గ్యాంబా (P. Dorji Gyamba) మర్యాదపూర్వకంగా భేటీ అయ్యారు. ఇవాళ హైదరాబాద్‌లోని స్టేట్ కమాండ్ కంట్రోల్ సెంటర్‌లో ఈ సమావేశం జరిగింది. గోదావరి బోర్డు చైర్మన్‌గా బాధ్యతలు చేపట్టిన తర్వాత దోర్జీ గ్యాంబా సీఎంను కలవడం ఇదే మొదటిసారి.

కీలక అంశాలపై చర్చ..

ఈ సందర్భంగా రాష్ట్రంలోని గోదావరి నది పరివాహక ప్రాంతాల్లో కొనసాగుతున్న నీటి పారుదల ప్రాజెక్టులు, జలాల వినియోగం, అంతర్రాష్ట్ర జల వివాదాలకు సంబంధించిన పలు ప్రాథమిక అంశాలు వారి మధ్య చర్చకు వచ్చినట్లుగా సమాచారం. ఈ భేటీలో సీఎంతో పాటు రాష్ట్ర నీటి పారుదల శాఖ కార్యదర్శి సి.శ్రీధర్ (C.Sridhar) కూడా పాల్గొన్నారు. రాష్ట్ర ప్రభుత్వం ప్రతిష్టాత్మకంగా చేపట్టిన ప్రాజెక్టుల పురోగతిని, గోదావరి జలాల్లో తెలంగాణకు ఉన్న వాటా, హక్కులను ఈ సందర్భంగా అధికారులు చైర్మన్ దృష్టికి తీసుకెళ్లారు. అయితే, కమాండ్ కంట్రోల్ సెంటర్ వంటి కీలక వేదికపై ఈ సమావేశం జరగడం ప్రాధాన్యతను సంతరించుకుంది. రాష్ట్రంలో సాగునీటి రంగాన్ని బలోపేతం చేయడం, రైతులకు సకాలంలో నీరందించడంపై ప్రభుత్వం ప్రత్యేక దృష్టి సారించిందని సీఎం ఈ సందర్భంగా పేర్కొన్నట్లుగా తెలుస్తోంది. బోర్డు పరిధిలోని సాంకేతిక అంశాలు, రాష్ట్ర ప్రయోజనాలకు సంబంధించి భవిష్యత్తులో బోర్డు నుంచి పూర్తి సహకారం ఉంటుందని చైర్మన్ దోర్జీ గ్యాంబా ఆశాభావం వ్యక్తం చేశారు.