తెలంగాణ వర్సిటీల్లో గ్లోబల్ వెంచర్ ఎడ్యుకేషన్.. నార్త్ ఈస్టర్న్ యూనివర్సిటీ బృందం

దిశ, తెలంగాణ బ్యూరో: రాష్ట్రంలోని యూనివర్శిటీల నెట్‌వర్క్ ద్వారా వ్యవస్థాపకతతో వేగవంతమైన పైలట్ ప్రాజెక్టులను చేపట్టేందుకు సహకరించాలని విదేశీ ప్రతినిధులు తెలంగాణ ఉన్నత విద్యా మండలిని కోరారు. రాష్ట్రంలోని ఉన్నత విద్యా సంస్థల్లో వ్యవస్థాపకత, వెంచర్ ఎడ్యుకేషన్ ను ప్రోత్సహించే లక్ష్యంతో గురువారం రాష్ట్ర ఉన్నత విద్యామండలి కార్యాలయాన్ని అమెరికాలోని బోస్టన్‌కు చెందిన ప్రముఖ నార్త్ ఈస్టర్న్ యూనివర్సిటీ ప్రతినిధుల బృందం సందర్శించింది. రాష్ట్రంలో నైపుణ్యాభివృద్ధి మరియు ఉన్నత విద్యను అంతర్జాతీయీకరించడానికి ప్రభుత్వం తీసుకుంటున్న చర్యలను ఈ సందర్భంగా ఉన్నత విద్యా మండలి అధికారులు ప్రతినిధులకు వివరించారు. ఉన్నత విద్యా రంగంలో గ్లోబల్ వెంచర్ ఎడ్యుకేషన్, వ్యవస్థాపకత పెంపొందించడమే లక్ష్యంగా ఈ సమావేశం జరిగింది. నార్త్ ఈస్టర్న్ యూనివర్సిటీ అంతర్జాతీయ ప్రోగ్రామ్స్ డైరెక్టర్ ప్రొఫెసర్ గ్రెగొరీ కొల్లియర్, అడ్వైజరీ బోర్డు సభ్యులు క్రిష్ నంగెగడ్డలతో కూడిన బృందం ఉన్నత విద్యామండలి చైర్మన్ ప్రొఫెసర్ వి. బాలకిష్టా రెడ్డి, కార్యదర్శి ప్రొఫెసర్ శ్రీరామ్ వెంకటేష్లతో భేటీ అయ్యారు. ఈ సందర్భంగా తెలంగాణలోని విశ్వవిద్యాలయాల్లో వ్యవస్థాపకతను ప్రోత్సహించడానికి క్లస్టర్ డెవలప్‌మెంట్ మోడల్‌ను ఈ బృందం ప్రతిపాదించింది.

న్యూ ఐడియా' మోడల్ ద్వారా వినూత్న ఆవిష్కరణలను ప్రోత్సహించి, క్రమబద్ధంగా స్టార్టప్ వెంచర్లను ఎలా సృష్టించవచ్చో వివరించారు. నైపుణ్యాభివృద్ధి కి వెంచర్ ఎడ్యుకేషన్, ఎగ్జిక్యూషన్ రంగాల్లో అనుభవపూర్వక అభ్యాసం ద్వారా సామర్థ్యాన్ని పెంచేందుకు తమ నైపుణ్యాన్ని పంచుకుంటామని ప్రతినిధులు తెలిపారు. ఎంటర్‌ప్రెన్యూర్‌షిప్, కరికులం డెవలప్‌మెంట్‌లో క్రెడిట్ ఆధారిత ఆన్‌లైన్ సర్టిఫికేషన్ కోర్సులను ప్రవేశపెట్టడంపై చర్చించారు. ఈ సందర్భంగా తెలంగాణలో నైపుణ్యాభివృద్ధి, ఉన్నత విద్య అంతర్జాతీయీకరణ కోసం ప్రభుత్వం తీసుకుంటున్న చర్యలను మండలి అధికారులు వారికి వివరించారు. 1898లో స్థాపించబడిన నార్త్ ఈస్టర్న్ యూనివర్సిటీ, అమెరికాలో వ్యవస్థాపక ర్యాంకింగ్స్ మరియు పరిశోధనల్లో అగ్రగామిగా కొనసాగుతోంది. 1898లో స్థాపించబడిన నార్త్ ఈస్టర్న్ యూనివర్సిటీ, పరిశోధన, వ్యవస్థాపకత ర్యాంకింగ్స్‌లో అమెరికాలోని టాప్ 10 వర్సిటీలలో ఒకటిగా గుర్తింపు పొందింది.