ప్రతి విద్యార్థి చేతికి ప్రయోగం.. 6వ నుంచి 10వ తరగతి వరకు ల్యాబ్ మాన్యువల్స్ పంపిణీ

దిశ, తెలంగాణ బ్యూరో: రాష్ట్రంలోని 6వ తరగతి నుంచి 10వ తరగతి వరకు చదువుతున్న విద్యార్థుల్లో ప్రయోగాల ద్వారా అభ్యసనాన్ని బలోపేతం చేసేందుకుగాను గణితం, సైన్స్ ల్యాబ్ మాన్యువల్స్‌ను పంపిణీ చేయాలని పాఠశాల విద్య సంచాలకులు డాక్టర్ ఇ. నవీన్ నికోలస్ (Naveen Nicholas) ఆదేశాలు జారీ చేశారు. రాష్ట్ర పాఠ్య ప్రణాళిక విద్యార్థుల పరిశీలనలు, అనుభవాల పై ఆధారపడి, విద్యను వారి రోజువారీ జీవితాలకు మరింత సందర్భోచితంగా మార్చడానికి ప్రాధాన్యత ఇస్తుంది. దీనిలో భాగంగా, ప్రయోగాలను సమర్థవంతంగా నిర్వహించడానికి ల్యాబ్ మాన్యువల్స్ అవసరాన్ని పాఠశాల విద్యాశాఖ గుర్తించింది.

మాన్యువల్స్ పంపిణీ వివరాలు

ఈ ల్యాబ్ మాన్యువల్స్‌ను రాష్ట్రంలోని ప్రభుత్వ, స్థానిక సంస్థల, కేజీబీవీ, మోడల్ స్కూల్స్, టీఆర్ఐఈఎస్, యూఆర్ఎస్ పాఠశాలలకు, అప్పర్ ప్రైమరీ స్కూల్స్‌కు పంపిణీ చేస్తారు. ఈ మాన్యువల్స్‌ను ఇంగ్లీష్ మీడియంలో అభివృద్ధి చేసినప్పటికీ, వీటిని తెలుగు, ఉర్దూ మీడియం విద్యార్థులకు కూడా ఉపయోగించవచ్చని అధికారులు తెలిపారు. సైన్స్ ల్యాబ్ మాన్యువల్స్ (జనరల్ సైన్స్, ఫిజికల్ సైన్స్, బయోలాజికల్ సైన్స్) ముద్రణ పూర్తయి, జిల్లాలకు పంపిణీ ప్రారంభమైంది. గణిత ల్యాబ్ మాన్యువల్స్ ముద్రణ పురోగతిలో ఉందని, త్వరలో అందుబాటులోకి వస్తాయని పేర్కొన్నారు.

పాఠశాల స్థాయిలో పంపిణీ చేయాల్సిన మాన్యువల్స్ :

6 నుండి 7 వ తరగతులకు జనరల్ సైన్స్ లో 4 కాపీలు (ఒక్కో తరగతికి 2 కాపీలు), గణితంలో 4 కాపీలు (ఒక్కో తరగతికి 2 కాపీలు) చొప్పున మొత్తం 8 మాన్యువల్స్ పంపిణీ చేస్తారు. 8 నుండి 10 వ తరగతులకు ఫిజికల్ సైన్సెస్ లో 6 కాపీలు (ఒక్కో తరగతికి 2 కాపీలు), బయోలాజికల్ సైన్సెస్ లో 6 కాపీలు (ఒక్కో తరగతికి 2 కాపీలు), గణితం లో 6 కాపీలు (ఒక్కో తరగతికి 2 కాపీలు) చొప్పున మొత్తం 26 మాన్యువల్స్‌ను (16 సైన్స్, 10 గణితం) పంపిణీ చేస్తారు. ప్రతి మాన్యువల్‌ను ఒక్కో తరగతికి 2 కాపీల చొప్పున పంపిణీ చేయాలి. ఈ మాన్యువల్స్ ఉపాధ్యాయుల వ్యక్తిగత కాపీలు కావు, పాఠశాలలో సామూహిక వినియోగం కోసం ఉంచాలి.

డీఈఓలు శ్రద్ధ వహించాలి:

జిల్లా విద్యాధికారులు (డీఈఓలు) మాన్యువల్స్ పంపిణీ, వినియోగంపై వ్యక్తిగత శ్రద్ధ వహించాలని డైరెక్టర్ సూచించారు. మాన్యువల్స్‌ను ఉపాధ్యాయులు వ్యక్తిగత కాపీలుగా కాకుండా, పాఠశాలలో సామూహిక వినియోగం కోసం ఉంచాలని, ల్యాబ్ మాన్యువల్స్ వంద శాతం పాఠశాలలకు చేరేలా చూడాలన్నారు. ల్యాబ్‌లు సరిగ్గా పనిచేసేలా చూస్తూ, ఉపాధ్యాయులు మాన్యువల్‌లోని కార్యకలాపాలను వారి సాధారణ బోధనలో భాగం చేయాలని పేర్కొన్నారు. ఉపాధ్యాయులు ప్రయోగాన్ని లేదా కార్యకలాపాన్ని ముందుగానే పూర్తిగా సిద్ధం చేసుకోవాలని, విద్యార్థులను ప్రశ్నలు అడగమని, ఫలితాలను చర్చించమని, కార్యకలాపాలను నిజ జీవిత పరిస్థితులకు ముడిపెట్టమని ప్రోత్సహించాలని సూచించారు. మాన్యువల్స్‌ను కేవలం నోట్స్ రాయడానికి కాకుండా, చేతల ద్వారా అభ్యసనానికి ఒక సాధనంగా ఉపయోగించాలన్నారు.

ఉపాధ్యాయులు పూర్తి చేసిన కార్యకలాపాల రికార్డును పర్యవేక్షణ కోసం నిర్వహించాలన్నారు. విద్యార్థులందరికీ ఉపకరణాలు (అపారటస్) నిర్వహించడానికి, ప్రయోగాలు చేయడానికి సమాన అవకాశాలు కల్పించాలని తెలిపారు. కష్టమైన భావనలను బలోపేతం చేయడానికి పరిహార తరగతుల (రెమెడియల్ క్లాసెస్ ) సమయంలో కూడా మాన్యువల్స్‌ను ఉపయోగించాలని సూచించారు. ల్యాబ్ మాన్యువల్స్ వినియోగంలో నూతన పద్ధతులను పాఠశాల కాంప్లెక్స్ లేదా జిల్లా సమావేశాలలో ఉపాధ్యాయులు పరస్పరం పంచుకోవచ్చని తెలిపారు.