హకీంపేట పర్యటనకు సీఎం రేవంత్ రెడ్డి
ముఖ్యమంత్రి ఎ. రేవంత్ రెడ్డి స్వంత నియోజకవర్గమైన కొడంగల్ పరిధిలోని దుద్యాల మండలం హాకీంపేట్లో ఈ నెల 21న (మంగళవారం) పర్యటించనున్నారు.
దిశ,కొడంగల్ : ముఖ్యమంత్రి ఎ. రేవంత్ రెడ్డి స్వంత నియోజకవర్గమైన కొడంగల్ పరిధిలోని దుద్యాల మండలం హాకీంపేట్లో ఈ నెల 21న (మంగళవారం) పర్యటించనున్నారు. ముఖ్యమంత్రి పర్యటన ఖరారు కావడంతో స్థానిక రెవెన్యూ, పోలీస్, వివిధ శాఖల అధికారులు ముందస్తు ఏర్పాట్లలో నిమగ్నమయ్యారు.
క్షేత్రస్థాయిలో ముమ్మర ఏర్పాట్లు – అధికారుల పరిశీలన:
ముఖ్యమంత్రి పర్యటనను పురస్కరించుకుని ఆదివారం ప్రత్యేక అధికారి వెంకట్రెడ్డి, ఆర్ అండ్ బి (R&B) డీఈ సురేందర్, దుద్యాల తహసీల్దార్ (MRO), ఎస్ఐ (SI), కొడంగల్ సీఐ (CI) తదితర ఉన్నతాధికారులు హాకీంపేట్లో పర్యటించారు. సీఎం పర్యటించే మార్గాలను, హెలిప్యాడ్ స్థలాన్ని, సమీక్షా సమావేశం జరిగే ప్రాంతాలను క్షేత్రస్థాయిలో పరిశీలించి, ఏర్పాట్లపై దిశానిర్దేశం చేశారు. హాకీంపేట్ పరిధిలో ప్రస్తుతం కొనసాగుతున్న పలు కీలక అభివృద్ధి కార్యక్రమాలను ముఖ్యమంత్రి రేవంత్ రెడ్డి స్వయంగా పరిశీలించనున్నారు. జిల్లా స్థాయి ఉన్నతాధికారులతో కలిసి క్షేత్రస్థాయిలో పనుల పురోగతిని పరిశీలించిన అనంతరం, అక్కడే అధికారులతో సమగ్ర సమీక్షా సమావేశం నిర్వహించనున్నారు.
సమీక్షలో ప్రాధాన్యత సంతరించుకోనున్న అంశాలు: పరిశ్రమల జోన్ పనులు:హాకీంపేట్, లగచర్ల, పోలేపల్లి గ్రామాల్లో ప్రతిపాదిత పారిశ్రామిక అభివృద్ధి పనులు, భూసేకరణ పురోగతి,మౌలిక వసతుల కల్పనపై సీఎం ప్రత్యేక దృష్టి సారించనున్నారు.
స్థానిక మౌలిక వసతులు: నియోజకవర్గంలో నూతనంగా మంజూరైన రహదారులు, పెండింగ్ ప్రాజెక్టుల పనులను త్వరితగతిన పూర్తి చేయడంపై అధికారులకు దిశానిర్దేశం చేయనున్నారు.
సంక్షేమ పథకాల అమలు:మండలంలో ప్రజా సంక్షేమ పథకాలు క్షేత్రస్థాయిలో అర్హులకు అందుతున్న తీరును అధికారులను అడిగి తెలుసుకోనున్నారు. ముఖ్యమంత్రి రాకను పురస్కరించుకుని నియోజకవర్గ కాంగ్రెస్ నాయకులు, స్థానిక యంత్రాంగం పర్యటనను విజయవంతం చేసేందుకు భారీ ఏర్పాట్లు చేస్తున్నారు. శాంతిభద్రతల దృష్ట్యా పోలీస్ శాఖ ఆధ్వర్యంలో ముందస్తు భద్రతా చర్యలు చేపట్టారు.
Next Story
