వరంగల్, ఆదిలాబాద్ ఎయిర్పోర్ట్లపై BIG అప్డేట్
తెలంగాణ రాష్ట్రంలో విమానయాన రంగాన్ని బలోపేతం చేసేందుకు, ప్రాంతీయ కనెక్టివిటీని పెంపొందించేందుకు ప్రభుత్వం అత్యంత ప్రాధాన్యత ఇస్తోందని ముఖ్యమంత్రి రేవంత్ రెడ్డి స్పష్టం చేశారు.
దిశ, వెబ్డెస్క్: తెలంగాణ రాష్ట్రంలో విమానయాన రంగాన్ని బలోపేతం చేసేందుకు, ప్రాంతీయ కనెక్టివిటీని పెంపొందించేందుకు ప్రభుత్వం అత్యంత ప్రాధాన్యత ఇస్తోందని ముఖ్యమంత్రి రేవంత్ రెడ్డి స్పష్టం చేశారు. ఢిల్లీ పర్యటనలో ఉన్న ఆయన మీడియా ప్రతినిధులతో మాట్లాడారు. తెలంగాణ ప్రగతికి ఊతమిచ్చేలా వరంగల్, ఆదిలాబాద్ విమానాశ్రయాల అభివృద్ధిపై కేంద్ర పౌర విమానయాన శాఖ మంత్రి రామ్మోహన్ నాయుడుతో ఫలప్రదమైన చర్చలు జరిపినట్లు ఆయన వెల్లడించారు. వరంగల్, ఆదిలాబాద్ విమానాశ్రయాల నిర్మాణ పనులను వేగవంతం చేసి, 2028 జూన్ 2 (తెలంగాణ జవనోత్సవం/రాష్ట్ర ఆవిర్భావ దినోత్సవం) నాటికి పూర్తి చేయాలని, అదే రోజున వీటిని ప్రారంభించాలని స్పష్టమైన లక్ష్యంతో పనిచేస్తున్నట్లు సీఎం ప్రకటించారు.
దేశ జీడీపీలో తెలంగాణ కీలక పాత్ర..
దేశ మొత్తం జనాభాలో తెలంగాణ జనాభా కేవలం 2.50 శాతమే అయినప్పటికీ.. దేశ జీడీపీలో (GDP) రాష్ట్రం ఏకంగా 5 శాతం వాటాను కలిగి ఉంటూ దేశ ఆర్థిక వ్యవస్థలో కీలక పాత్ర పోషిస్తోందని సీఎం రేవంత్ రెడ్డి గుర్తుచేశారు. రాష్ట్రం మరింత వేగంగా అభివృద్ధి చెందాలంటే అంతర్జాతీయ స్థాయి ప్రమాణాలతో కూడిన విమానాశ్రయాల అవసరం ఎంతైనా ఉందన్నారు. వరంగల్ విమానాశ్రయ నిర్మాణ శైలి, ఆకృతిలో (Design) కాకతీయ సంస్కృతి, సాంప్రదాయాలకు పెద్దపీట వేస్తున్నట్లు సీఎం రేవంత్ రెడ్డి ప్రత్యేకంగా ప్రస్తావించారు. ఈ రెండు ఎయిర్పోర్టుల నిర్మాణానికి కేంద్ర మంత్రి రామ్మోహన్ నాయుడు పూర్తి స్థాయిలో సహకరిస్తున్నారని ఈ సందర్భంగా సీఎం రేవంత్ రెడ్డి స్పష్టం చేశారు. కేంద్ర ప్రభుత్వం నుంచి అవసరమైన అన్ని రకాల అనుమతులు, సహకారం కోసం నిరంతరం చర్చలు జరుపుతున్నామని చెప్పారు. కేవలం అభివృద్ధిని మాత్రమే లక్ష్యంగా పెట్టుకుని కేంద్ర, రాష్ట్ర ప్రభుత్వాల మధ్య సహకార స్ఫూర్తి (Federal Spirit) కొనసాగుతుందని ఆయన స్పష్టం చేశారు. పార్లమెంట్ సమావేశాల సమయంలో తాను క్రమం తప్పకుండా ఢిల్లీకి వస్తుంటానని, ఆయా సందర్భాల్లో కేంద్ర మంత్రులను కలిసి రాష్ట్ర ప్రాజెక్టులపై చర్చిస్తానని ముఖ్యమంత్రి రేవంత్ రెడ్డి పునరుద్ఘాటించారు.
