రైతన్నకు ‘అమెజాన్’ భరోసా.. నెటాఫిమ్‌తో కలిసి 325 మి.లీ నీటి ఆదాకు శ్రీకారం

దిశ, వెబ్‌డెస్క్: పర్యావరణ పరిరక్షణతో పాటు వ్యవసాయ రంగాన్ని బలోపేతం చేసే దిశగా ప్రముఖ ఇ-కామర్స్ దిగ్గజం అమెజాన్ ఇండియా, నీటిపారుదల రంగంలో ప్రపంచ అగ్రగామి నెటాఫిమ్ (Netafim)తో చేతులు కలిపింది. బెంగళూరు, హైదరాబాద్ నగరాల పరిధిలోని వ్యవసాయ ప్రాంతాల్లో అత్యాధునిక బిందు సేద్యం (Drip Irrigation) ప్రాజెక్టులను ప్రారంభించినట్లు సంస్థ ప్రతినిధులు వెల్లడించారు. ఈ ఉమ్మడి భాగస్వామ్యంతో ఏటా దాదాపు 325 మిలియన్ లీటర్ల నీటిని ఆదా చేయాలని లక్ష్యంగా పెట్టుకున్నారు. సంప్రదాయ వరద నీటిపారుదల పద్ధతికి స్వస్తి పలికి, బిందు సేద్యాన్ని ప్రవేశపెట్టడం ద్వారా ఈ భారీ మార్పు సాధ్యం కానుంది. ఇది భూగర్భ జలాల సంరక్షణతో పాటు పట్టణ ప్రాంతాల్లో పెరుగుతున్న నీటి ఎద్దడిని తగ్గించడానికి దోహదపడుతుంది.

రైతులకు చేకూరే ప్రయోజనాలు ఇవే..

మొత్తం 120 హెక్టార్ల సాగు భూమిలో ఈ ప్రాజెక్టు అమలవుతుంది. దాదాపు 110 మంది స్వతంత్ర రైతులకు ఈ సాంకేతికత అందుబాటులోకి వస్తుంది. బెంగళూరులో టమాటా, హైదరాబాద్‌లో మొక్కజొన్న, కూరగాయల సాగు చేసే రైతులకు ఇది ఎంతో మేలు చేస్తుంది. బెంగళూరు పశ్చిమ ప్రాంతంలో సుమారు 80 హెక్టార్ల విస్తీర్ణంలో 70 మంది రైతులకు ఈ ప్రాజెక్టు ఉపయోగపడునుంది. ఏటా 175 మిలియన్ లీటర్ల నీటిని ఆదా చేయడం దీని ప్రధాన ఉద్దేశం. ప్రస్తుతం ఇక్కడి రైతులు టీజీ హల్లి రిజర్వాయర్‌పై ఆధారపడుతున్నారు.

హైదరాబాద్ పరిసరాల్లో..

హైదరాబాద్ పరిసరాల్లోని 40 హెక్టార్లలో 40 మంది రైతులకు బిందు సేద్య పరికరాలను అందించనున్నారు. దీంతో ఏటా 150 మిలియన్ లీటర్ల నీరు ఆదా అవుతుంది. ఇక్కడి పొలాలు ప్రస్తుతం కాళేశ్వరం ప్రాజెక్టులో భాగమైన కొండ పోచమ్మ సాగర్ రిజర్వాయర్ నుండి నీటిని పొందుతున్నాయి. ఈ సందర్భంగా అమెజాన్ ఇండియా వైస్ ప్రెసిడెంట్ అభినవ్ సింగ్ మాట్లాడుతూ.. నీటి కొరత ఉన్న ప్రాంతాల్లో బాధ్యతాయుతమైన నీటి వినియోగానికి మేము కట్టుబడి ఉన్నామని అన్నారు. రైతులు తమ సాగు పద్ధతులను మెరుగుపరుచుకునేలా ఆచరణాత్మక పరిష్కారాలను అందిస్తున్నామని తెలిపారు.

అమెజాన్ తన కార్యకలాపాల ద్వారా వినియోగించే నీటికంటే ఎక్కువ మొత్తాన్ని సమాజానికి తిరిగి ఇవ్వాలనే ‘వాటర్ పాజిటివ్’ నిబద్ధతతో ఉంది. ఇందుకోసం భారతదేశంలో ఇప్పటివరకు రూ.42 కోట్లకు పైగా పెట్టుబడి పెట్టింది. దీని ద్వారా ఏటా 3 బిలియన్ లీటర్ల నీటిని పునరుద్ధరించే అవకాశం ఉంది. బిందు సేద్యం ద్వారా నీరు నేరుగా మొక్కల వేళ్లకే అందుతుంది. దీనివల్ల నీటి వృథా తగ్గి, పంట దిగుబడి పెరుగుతుంది. శీతోష్ణస్థితి మార్పులను తట్టుకుంటూ సుస్థిర వ్యవసాయం చేసేందుకు నెటాఫిమ్ తనవంతు సహకారాన్ని అందించనుంది.