స్వప్నసుందరిగా ‘ఖుషీ’ ఎంట్రీ ?

దిశ, వెబ్‌డెస్క్: దర్శకేంద్రుడి మాయాజాలం గురించి ప్రత్యేకంగా చెప్పనవసరం లేదు. కమర్షియల్ చిత్రాలకు కేరాఫ్ అడ్రస్‌గా నిలిచిన రాఘవేంద్రరావు, ఆ తర్వాత భక్తిరస చిత్రాలతోనూ వెండితెరపై తనదైన ముద్ర వేశాడు. చాలా కాలం తర్వాత మళ్లీ ఆయన ఓ కమర్షియల్ చిత్రాన్ని తెరకెక్కిస్తున్నట్లు ప్రకటించాడు. అది కూడా.. రెండు దశాబ్దాల క్రితం విడుదలైన ‘పెళ్లి సందడి’కి సీక్వెల్ కావడం మరో విశేషం. ఈ చిత్రంలో హీరోగా శ్రీకాంత్ కుమారుడు రోషన్ నటిస్తున్నట్లు తెలుస్తుండగా.. హీరోయిన్‌గా అతిలోక సుందరి తనయ ఎంట్రీ ఇవ్వబోతున్నట్టు సమాచారం. ఇక ఈ చిత్రానికి కీరవాణి స్వరాలు సమకూరుస్తుండగా, శివశక్తి దత్తా, చంద్రబోస్ సాహిత్యం అందిస్తున్నారు.

రాఘవేంద్ర రావు తీసిన సినిమాల్లో.. ‘పెళ్లి సందడి’కి ప్రత్యేక స్థానం ఉంది. మ్యూజికల్‌గానూ సూపర్ హిట్ సాధించిన ఈ చిత్రం.. శ్రీకాంత్ కెరీర్‌లో ఓ మైలురాయిగా నిలిచి, ఆయనకు స్టార్ స్టేటస్ తెచ్చిపెట్టింది. కాగా, హీరో శ్రీకాంత్‌కు ఓ గొప్ప చిత్రాన్ని అందివ్వడంతో పాటు, కెరీర్ బూస్ట్ అందించిన దర్శకేంద్రుడు.. ఈ సారి ఆయన తనయునికి ‘పెళ్లిసందడి’ సీక్వెల్‌తో బ్రేక్ త్రూ అందించాలని చూస్తున్నట్టు సమాచారం. ఈ సినిమాలో హీరోగా ఇప్పటికే రోషన్‌ను ఫిక్స్ చేశారని ఫిల్మ్ నగర్ టాక్. మరి ఈ సినిమాలో సౌందర్య లహరి ఎవరు? అన్నదే యావత్ తెలుగు అభిమానుల్లో ఉన్న ప్రశ్న. శ్రీదేవిని అతిలోక సుందరిగా చూపించిన దర్శకేంద్రుడు ఈ సారి శ్రీదేవి చిన్న కూతరు ‘ఖుషీ’ని స్వప్నసుందరిగా చూపించబోతున్నాడని సమాచారం. ఈ మేరకు పెళ్లిసందడి చిత్ర యూనిట్ బోనీకపూర్‌తో పాటు ఖుషీని సంప్రదించినట్లు తెలుస్తోంది. ఖుషీ టాలీవుడ్ ఎంట్రీ నిజమో కాదో తెలియాలంటే.. అధికారిక ప్రకటన వరకు వేచి చూడాల్సిందే. ఇదే నిజమైతే జాన్వి కంటే ముందే.. ఖుషీ తెలుగు వారికి పరిచయం అవుతుంది.