బిలియనీర్ జాబితాలో చేరిన క్రిస్టియానో రొనాల్డో

దిశ, వెబ్ డెస్క్: ప్రపంచ ఫుట్‌బాల్ దిగ్గజం క్రిస్టియానో రొనాల్డో (Cristiano Ronaldo) బిలియనీర్ జాబితా (Billionaire List)లో చోటు దక్కించుకున్నారు. రాయిటర్స్, బ్లూమ్‌బర్గ్ నివేదికల ప్రకారం, రొనాల్డో నికర ఆస్తి ప్రస్తుతం సుమారు 1.4 బిలియన్ అమెరికన్ డాలర్లకు చేరుకున్నట్లు అంచనా వేశారు. దీంతో రొనాల్డో ప్రపంచంలోనే మొదటి బిలియనేర్ ఫుట్‌బాల్ ఆటగాడిగా గుర్తింపు పొందాడు. 2025 లో సౌదీ అరేబియాలోని అల్-నాసర్ క్లబ్‌లో ఆయన చేసుకున్న భారీ ఒప్పందం, వివిధ బ్రాండ్లతో ఉన్న endorsements, అలాగే తన CR7 బ్రాండ్, హోటల్స్, సుగంధ ద్రవ్యాలు, ఫ్యాషన్ వ్యాపారాలు ఈ ఆర్థిక విజయానికి ప్రధాన కారణాలుగా ఉన్నాయి. రొనాల్డో గత రెండు దశాబ్దాలుగా ఫుట్‌బాల్ వేతనాలు, ప్రచార ఒప్పందాల ద్వారా సుమారు 550 మిలియన్ డాలర్లు సంపాదించినట్లు నివేదికలు చెబుతున్నాయి.

అంతేకాకుండా.. ఫోర్బ్స్ విడుదల చేసిన 2025 అత్యధిక సంపాదన కలిగిన ఆటగాళ్ల జాబితాలో రొనాల్డో మొదటి స్థానంలో నిలిచారు. ఆయన తర్వాత లియోనెల్ మెస్సీ, కైలియన్ ఎంబప్పే వంటి ఆటగాళ్లు ఉన్నారు. నైకీ, ఆర్మేనీ, కాస్ట్రోల్ వంటి అంతర్జాతీయ బ్రాండ్లతో ఉన్న ఆయన దీర్ఘకాల ఒప్పందాలు కూడా రోనాల్డో ఆదాయానికి బలమైన ఆధారం అయ్యాయి. అయితే కొన్ని వనరులు ఆయన నికర ఆస్తి ఇంకా $800 మిలియన్ నుంచి $1.45 బిలియన్ మధ్యలో ఉందని సూచిస్తున్నాయి. అయినప్పటికీ, రొనాల్డో పేరు ఇప్పుడు క్రీడా చరిత్రలో బిలియనీర్ స్థాయిని అందుకున్న మొదటి ఫుట్‌బాలర్‌గా నిలిచిపోయింది.