ఆపరేషన్‌ సిందూర్.. ఈ 9 స్థావరాల్లోనే ఎందుకు దాడులు జరిపింది?

దిశ, వెబ్ డెస్క్: పహల్గాం ఉగ్రదాడికి భారత్‌ సైన్యం ప్రతీకారం తీర్చుకుంది. భారత త్రివిధ దళాలు సంయుక్తంగా 'ఆపరేషన్ సిందూర్' (Operation Sindoor) పేరుతో పాకిస్థాన్, పాక్ ఆక్రమిత కశ్మీర్ (PoK)లోని 9 ఉగ్రవాద శిబిరాలపై మెరుపు దాడులు చేశాయి. లష్కరే తోయిబా, జైషే మహ్మద్ (JEM), హిజ్బుల్ ముజాహిదీన్ వంటి ఉగ్రవాద సంస్థలు వినియోగిస్తున్న రవాణా, కార్యకలాపాలు, శిక్షణకు సంబంధించిన కీలక మౌలిక సదుపాయాలను ధ్వంసం చేయడమే లక్ష్యంగా భారత్ ఈ దాడులకు దిగింది. అంతేకాదు, భారత్ సైన్యం టార్గెట్ చేసిన 9 స్థావరాలు గతంలో భారత్‌పై ఉగ్రదాడులు, చొరబాట్ల యత్నాలకు పాల్పడిన చరిత్ర కలిగి ఉన్నాయి.

పాకిస్థాన్‌లోని దక్షిణ పంజాబ్‌లో ఉన్న బహవల్పూర్ ప్రాంతం భారతదేశ మోస్ట్ వాంటెడ్ పాకిస్తాన్ ఉగ్రవాది మసూద్ అజార్‌ నేతృత్వంలోని జైషే మహ్మద్ ఉగ్రవాద సంస్థకు ప్రధాన కేంద్రంగా పేరుగాంచింది. 2001 పార్లమెంట్ దాడి, 2019 పుల్వామా ఆత్మాహుతి దాడి వంటి అనేక దాడులకు ఈ సంస్థ సంబంధం కలిగి ఉంది. అంతేకాదు, బహవల్‌పూర్‌లో ఉగ్రవాద సంస్థకు నాలుగు శిక్షణా కేంద్రాలు ఉన్నాయని సమాచారం. అందుకే భారత సైన్యం ప్రధానం టార్గెట్‌గా ఈ స్థావరాన్ని ఎంచుకున్నట్లు సమాచారం.

లాహోర్‌కు సుమారు 40 కిలోమీటర్ల ఉత్తరాన ఉన్న మురిడ్కే, లష్కరే తోయిబా, దాని సేవా విభాగం జమాత్-ఉద్-దవాకు చాలా కాలంగా కీలక స్థావరంగా ఉంది. 200 ఎకరాలకు పైగా విస్తరించి ఉన్న ఈ ఉగ్రవాద కేంద్రంలో శిక్షణ ప్రాంతాలు, భావజాల వ్యాప్తి కేంద్రాలు, రవాణా సదుపాయాలు ఉన్నాయి. 2008 ముంబై దాడుల వెనుక లష్కరే తోయిబా హస్తం ఉందని భారత్ ఆరోపిస్తోంది. 26/11 దాడులకు పాల్పడిన ఉగ్రవాదులు ఇక్కడే శిక్షణ పొందారని సమాచారం. ఈ నేపథ్యంలోనే ఇక్కడ భారత సైన్యం దాడులు జరిపింది.

భారత సైన్యం టార్గెట్ చేసిన మరో ప్రాంతం పాక్ ఆక్రమిత కశ్మీర్‌లోని కోట్లి. ఈ ప్రాంతం ఆత్మాహుతి బాంబర్లు, తిరుగుబాటుదారులకు ప్రధాన శిక్షణ కేంద్రంగా ఉంది. అధికార వర్గాల కథనం ప్రకారం.. కోట్లి కేంద్రంలో ఒకేసారి 50 మందికి పైగా శిక్షణ పొందే సామర్థ్యం ఉంది. ఇక జమ్మూకశ్మీర్‌లోని రాజౌరి, పూంచ్ ప్రాంతాలలో కార్యకలాపాల కోసం 2023, 2024లో గుల్పూర్‌ను పదేపదే ఫార్వర్డ్ లాంచ్‌ప్యాడ్‌గా ఉపయోగించినట్లు భావిస్తున్నారు. ఈ ప్రాంతాలలో భారత భద్రతా బలగాల కాన్వాయ్‌లు, పౌర లక్ష్యాలపై దాడులు చేసిన ఉగ్రవాదులకు ఈ ప్రదేశం ఒక వేదికగా ఉపయోగపడిందని సమాచారం.

సియాల్‌కోట్ సమీపంలోని మెహమూనా శిబిరాన్ని కశ్మీర్‌లో చారిత్రాత్మకంగా చురుకుగా ఉన్న హిజ్బుల్ ముజాహిదీన్ ఉగ్రవాద సంస్థ ఉపయోగించుకుంది. ఇటీవలి సంవత్సరాలలో ఈ బృందం క్షీణించినప్పటికీ, సరిహద్దు మీదుగా, ముఖ్యంగా స్థానిక మద్దతు నెట్‌వర్క్‌లు చెక్కుచెదరకుండా ఉన్న మెహమూనా వంటి ప్రాంతాల నుంచి మిగిలిన వారికి శిక్షణ ఇస్తున్నారని భారత అధికారులు చెబుతున్నారు.

ఉత్తర కశ్మీర్‌లోని సోన్‌మార్గ్, గుల్‌మార్గ్, పహల్గామ్ ప్రాంతాలలో జరిగిన దాడులతో సవాయ్‌కి సంబంధం ఉన్నట్లు భారత్ సైన్యం గుర్తించింది. అందుకే ఈ ప్రాంతంలో దాడులు జరిపింది. అంతర్జాతీయ సరిహద్దు, నియంత్రణ రేఖకు సమీపంలో ఉన్న సర్జల్, బర్నాలా చొరబాటుకు కీలక మార్గాలుగా పరిగణించబడుతున్నాయి.

కాగా, 1971 యుద్ధం తర్వాత పాకిస్థాన్ భూభాగంలో భారత్ చేపట్టిన మొదటి ఆపరేషన్ ఇది. పాకిస్తాన్ సైనిక స్థావరాలను లక్ష్యంగా చేసుకోలేదని భారత్ ఇప్పటికే ఒక ప్రకటనలో తెలిపింది. అలాగే, ఈ ఆపరేషన్ తర్వాత, భారతదేశం ప్రధాన ప్రపంచదేశాలతో దౌత్య సంబంధాలను ప్రారంభించింది.