BREAKING: ప్రభుత్వ ఏర్పాటులో విజయ్‌కు షాక్.. పర్మిషన్ ఇవ్వని గవర్నర్

దిశ, వెబ్‌డెస్క్: తమిళనాడు అసెంబ్లీ ఎన్నికల ఫలితాల్లో అతిపెద్ద పార్టీగా అవతరించిన 'తమిళగ వెట్రి కళగం' (TVK) ప్రభుత్వ ఏర్పాటులో కీలక అడ్డంకిని ఎదుర్కొంటోంది. మెజారిటీకి అతి సమీపంలోకి వచ్చినప్పటికీ, ప్రభుత్వం ఏర్పాటు చేసేందుకు తమిళనాడు గవర్నర్ నుంచి విజయ్‌కు అనుమతి లభించలేదు. మ్యాజిక్ ఫిగర్ విషయంలో విజయ్ ఇచ్చిన వివరణపై గవర్నర్ సంతృప్తి చెందకపోవడమే దీనికి ప్రధాన కారణంగా తెలుస్తోంది.

ఆగిన విజయకేతనం: 112 వద్దే మద్దతు

తమిళనాడు అసెంబ్లీలో మొత్తం 234 స్థానాలు ఉండగా.. ప్రభుత్వం ఏర్పాటు చేయడానికి కావాల్సిన స్పష్టమైన మెజారిటీ 118. అయితే.. ప్రస్తుత లెక్కల ప్రకారం విజయ్‌కు 112 మంది ఎమ్మెల్యేల మద్దతు మాత్రమే ఉన్నట్లు తెలుస్తోంది. ప్రభుత్వాన్ని ఏర్పాటు చేస్తామని క్లెయిమ్ చేసిన విజయ్, ఆరుగురు ఎమ్మెల్యేల లోటును భర్తీ చేసే విషయంలో గవర్నర్‌ను ఒప్పించలేకపోయారు. రాజ్యాంగ నిబద్ధత ప్రకారం సంపూర్ణ మెజారిటీ ఉంటేనే ప్రమాణ స్వీకారానికి అనుమతిస్తామని గవర్నర్ స్పష్టం చేశారు. "ప్రభుత్వ ఏర్పాటుకు ఖచ్చితంగా 118 మంది ఎమ్మెల్యేల మద్దతు ఉండాల్సిందే" అని ఆయన తేల్చి చెప్పారు. తన వద్ద ఉన్న బలాన్ని నిరూపించుకోవడంలో విజయ్ విఫలం కావడంతో, ప్రస్తుతానికి ప్రభుత్వ ఏర్పాటు ప్రక్రియ నిలిచిపోయింది.

ముందుకు రానున్న ఇతర పార్టీలు?

విజయ్‌కు మెజారిటీ లభించని పక్షంలో.. గవర్నర్ ఇతర పార్టీలైన ఏఐడీఎంకే (AIADMK) లేదా డీఎంకే (DMK) కు అవకాశం ఇస్తారా? లేక హంగ్ అసెంబ్లీ దిశగా పరిస్థితులు దారితీస్తాయా? అన్నది ఇప్పుడు ఉత్కంఠగా మారింది. మరోవైపు.. స్వతంత్రులు లేదా ఇతర చిన్న పార్టీల మద్దతు కూడగట్టేందుకు టీవీకే శ్రేణులు ప్రయత్నాలు ముమ్మరం చేసినట్లు సమాచారం. ఈ పరిణామంతో తమిళనాట రాజకీయాలు ఒక్కసారిగా అనిశ్చితిలోకి వెళ్లాయి. విజయ్ తన తదుపరి అడుగు ఎలా వేయబోతున్నారన్నదానిపైనే యావత్ దేశం ఫోకస్ పెట్టింది.