సర్కార్ కీలక నిర్ణయం.. సలహాదారులకు కేబినెట్ హోదా రద్దు

దిశ, వెబ్‌డెస్క్: తీవ్ర ఆర్థిక ఇబ్బందుల్లో ఉన్న హిమాచల్ ప్రదేశ్ ప్రభుత్వం కీలక నిర్ణయం తీసుకుంది. రాష్ట్ర ఆర్థిక పరిస్థితిని గాడిలో పెట్టేందుకు ముఖ్యమంత్రి సుఖ్విందర్ సింగ్ సుఖు నేతృత్వంలోని ప్రభుత్వం భారీగా పొదుపు చర్యలను ప్రకటించింది. ఇందులో భాగంగా వివిధ బోర్డులు, కార్పొరేషన్ల అధ్యక్షులు, సలహాదారులు, కన్సల్టెంట్‌లకు కల్పించిన 'కేబినెట్ హోదా'ను తక్షణమే రద్దు చేసింది. దీంతో పాటు, ప్రజాప్రతినిధులు మరియు ఉన్నతాధికారుల జీతభత్యాల్లో 20% కోత విధిస్తూ నిర్ణయం తీసుకుంది. ఈ కోత సెప్టెంబర్ 30, 2026 వరకు అమలులో ఉంటుందని ప్రభుత్వం స్పష్టం చేసింది.

కీలక నిర్ణయాలు..

మీడియా సలహాదారు నరేష్ చౌహాన్, పర్యాటక అభివృద్ధి సంస్థ చైర్మన్ ఆర్.ఎస్. బాలి, ఐటీ సలహాదారు గోకుల్ బుటైల్, రాజకీయ సలహాదారు సునీల్ శర్మ బిట్టు, ఇన్‌ఫ్రాస్ట్రక్చర్ సలహాదారు అనిల్ కపిల్ మరియు రాంపూర్ ఎమ్మెల్యే నంద్ లాల్ వంటి ప్రముఖులకు ఇప్పటివరకు ఉన్న కేబినెట్ హోదాలు రద్దయ్యాయి. గత కొంతకాలంగా బీజేపీ ప్రభుత్వంపై విపక్షాలు విమర్శలు చేస్తూ, సన్నిహితులకు కేబినెట్ పదవులు పంచుతున్నారని ఆరోపిస్తున్నాయి. ఈ నేపథ్యంలో తాజా నిర్ణయం రాజకీయ ప్రాధాన్యత సంతరించుకుంది.

బడ్జెట్‌పై ఉత్కంఠ..

కేంద్ర ఆర్థిక సంఘం నిధుల్లో కోత పడటంతో హిమాచల్ ప్రదేశ్ ప్రస్తుతం గడ్డు కాలాన్ని ఎదుర్కొంటోంది. ఈ క్రమంలో మార్చి 21న ముఖ్యమంత్రి సుఖు అసెంబ్లీలో రాష్ట్ర బడ్జెట్‌ను ప్రవేశపెట్టనున్నారు. స్వయం సమృద్ధ హిమాచల్ దిశగా ఈ బడ్జెట్‌లో మరిన్ని కఠిన నిర్ణయాలు ఉండే అవకాశం ఉంది.