చైనా వ్యాఖ్యలను ఖండించరే..? మోడీ సర్కారుపై ఓవైసీ ఫైర్

దిశ, నేషనల్ బ్యూరో: ఆపరేషన్ సిందూర్ సమయంలో భారత్, పాకిస్తాన్ మధ్య తాము మధ్యవర్తిత్వం చేశామని చైనా మంత్రి చేసిన వ్యాఖ్యలపై ఏఐఎంఐఎం చీఫ్ అసదుద్దీన్ ఓవైసీ మండిపడ్డారు. ఈ విషయంలో మోడీ ప్రభుత్వం మౌనంగా ఉండటాన్ని ప్రశ్నించిన ఓవైసీ.. పాక్‌కు 81 శాతం ఆయుధాలు చైనా నుంచే వస్తాయని, ఆపరేషన్ సిందూర్ సమయంలో పాక్‌కు చైనా రియల్‌-టైం ఇంటెలిజెన్స్ సహకారం అందించిందని గుర్తుచేశారు. అలాంటి దేశం ఇప్పుడు మధ్యవర్తిత్వం చేశామంటూ ప్రకటనలు చేస్తుంటే మోడీ ప్రభుత్వం మౌనంగా ఉండటమేంటని నిలదీశారు. ఈ వ్యాఖ్యలను అధికారికంగా భారత ప్రభుత్వం ఖండించాలని డిమాండ్ చేశారు. భారత సార్వభౌమత్వాన్ని తాకట్టుపెట్టి చైనాతో సంబంధాలు మెరుగుపరచుకోవాల్సిన అవసరం లేదని ఆయన స్పష్టంచేశారు. అదే సమయంలో మధ్యప్రదేశ్‌లో కలుషిత నీరు తాగి ప్రజలు మరణించడంపై కూడా ఓవైసీ ఆవేదన వ్యక్తంచేశారు.