రికార్డులు బద్దలు కొట్టడానికి రెడీ.. ‘మిర్జాపూర్’ రిలీజ్ డేట్ ఫిక్స్!

దిశ, సినిమా: ఓటీటీలో రికార్డుల రారాజుగా నిలిచిన ‘మిర్జాపూర్’(Mirzapur) ఇప్పుడు బిగ్ స్క్రీన్‌ను షేక్ చేయడానికి సిద్ధమైంది. అమెజాన్ ప్రైమ్ వీడియోలో మూడు సీజన్ల పాటు నెత్తురు, పగ, ప్రతీకారాలతో ప్రేక్షకులను ఉర్రూతలూగించిన ఈ క్రైమ్ డ్రామా, ఇప్పుడు వెండితెరపైకి రాబోతోంది. ‘మిర్జాపూర్: ది ఫిల్మ్’ విడుదల తేదీని మేకర్స్ అధికారికంగా ప్రకటించారు. ఈ సినిమాకు సంబంధించి ఫ్యాన్స్‌ను ఊపేస్తున్న అతిపెద్ద వార్త.. మున్నా భయ్యా (దివ్యేందు శర్మ) పునరాగమనం. వెబ్ సిరీస్ రెండో సీజన్‌లో మరణించినట్లు చూపించిన ఈ పాత్ర, ఇప్పుడు సినిమాలో మళ్ళీ కనిపిస్తుండటంతో అంచనాలు ఆకాశాన్ని తాకాయి. “అమర్ హై హమ్” (నేను అమరుణ్ణి) అన్న తన డైలాగ్‌ను నిజం చేస్తూ మున్నా భయ్యా ఇచ్చే ఎంట్రీ థియేటర్లలో ఈలలు వేయించడం ఖాయమనిపిస్తోంది. కాలీన్ భయ్యాగా పంకజ్ త్రిపాఠి, గుడ్డూ పండిట్‌గా అలీ ఫజల్ మరోసారి తలపడబోతున్నారట.

ఓటీటీ సిరీస్ కంటే పది రెట్లు ఎక్కువ యాక్షన్, వంద రెట్లు ఎక్కువ రచ్చ ఈ సినిమాలో ఉండబోతుందని దర్శకుడు గుర్మీత్ సింగ్ (Gurmeet Singh)హామీ ఇచ్చారు. ఇక ఈ క్రైమ్ యూనివర్స్‌లోకి ‘పంచాయతీ’ ఫేమ్ జితేంద్ర కుమార్, సీనియర్ నటుడు రవి కిషన్ చేరడం కథకు మరింత బలాన్ని చేకూర్చింది. వచ్చే ఏడాది సెప్టెంబర్ 4, 2026న ఈ సినిమా ప్రపంచవ్యాప్తంగా విడుదల కానుంది. ఆ సమయంలో కృష్ణాష్టమి సెలవులు ఉండటంతో బాక్సాఫీస్ వద్ద రికార్డులు బద్దలు కొట్టడానికి మేకర్స్ ప్లాన్ చేశారు. ఎక్సెల్ ఎంటర్టైన్మెంట్ నిర్మిస్తున్న ఈ చిత్రంపై ట్రేడ్ వర్గాల్లో ఇప్పటికే భారీ క్రేజ్ నెలకొంది.ఇక థియేటర్లలో విడుదలైన ఎనిమిది వారాల తర్వాతే ఈ సినిమా అమెజాన్ ప్రైమ్ వీడియోలోకి వస్తుంది. కాబట్టి మిర్జాపూర్ అసలు సిసలు మజాను ఆస్వాదించాలంటే ఈసారి కచ్చితంగా థియేటర్లకు వెళ్లాల్సిందే!

వివాదంలో మనోజ్ బాజ్‌పేయి సినిమా.. టైటిల్ మార్చకుంటే బ్యాన్ చేస్తామంటూ నెటిజన్ల వార్నింగ్