ఇది చూశాక నా గుండె తరుక్కుపోతుంది.. కన్నీళ్లు ఆగడం లేదంటూ రాఘవ లారెన్స్ ఎమోషనల్ ట్వీట్
డ్యాన్స్ కొరియోగ్రాఫర్ రాఘవ లారెన్స్(Raghava Lawrence) వరుస చిత్రాల్లో నటిస్తూ ఫుల్ ఫామ్లో దూసుకుపోతున్నారు.
దిశ, సినిమా: డ్యాన్స్ కొరియోగ్రాఫర్ రాఘవ లారెన్స్(Raghava Lawrence) వరుస చిత్రాల్లో నటిస్తూ ఫుల్ ఫామ్లో దూసుకుపోతున్నారు. ప్రస్తుతం బ్యాక్ టు బ్యాక్ ప్రాజెక్ట్ అనౌన్స్ చేస్తున్న ఆయన లారెన్స్ చారిటబుల్ ట్రస్ట్ ద్వారా ఎన్నో మంచి పనులు చేస్తూ ప్రశంసలు పొందుతున్నారు. అంతేకాకుండా సోషల్ మీడియా ద్వారా సహాయం కోరిన వారికి తనవంతుగా ఎంతో కొంత సహాయం అందిస్తున్నారు. ఇదిలా ఉంటే.. తాజాగా, లారెన్స్ ట్విట్టర్ ద్వారా ఓ ఎమోషనల్ పోస్ట్ పెట్టారు. ‘‘ఈ వీడియో చూసిన తర్వాత నా గుండె తరుక్కుపోతోంది. ‘మాస్’ సినిమా షూటింగ్లో తనను కలిశాను. అప్పట్లో ఓ స్కూల్లో చేర్చించాను.
కాకపోతే ఏడాది తర్వాత అక్కడి నుంచి వెళ్లిపోయాడని చెప్పారు. అతడిని కలిసేందుకు ఎంతో ప్రయత్నించాను. ఇన్నేళ్ల తర్వాత అతడిని చూస్తుంటే కన్నీళ్లు ఆగడం లేదు. అలా చెప్పకుండా వెళ్లిపోయినందుకు నేను కోప్పడతానేమోనని భయపడుతున్నట్లు ఇంటర్వ్యూలో చెప్పాడు. నిజం చెప్పాలంటే, నిన్ను కొట్టను, తిట్టను కేవలం ఒక్కసారి చూడాలని మాత్రం ఉంది. దయచేసి నన్ను వచ్చి కలువు. నీకోసం నేను ఎదురుచూస్తుంటా’’ అని అడ్రస్ కూడా ఇచ్చారు. అసలేం జరిగిందంటే.. చైల్డ్ ఆర్టిస్ట్గా నటించిన రవి రాథోడ్ 50కి పైగా చిత్రాల్లో కనిపించి ఫుల్ ఫేమ్ తెచ్చుకున్నాడు.
మరీ ముఖ్యంగా ‘విక్రమార్కుడు’ మూవీలో రవితేజతోనే గొడవ పెట్టుకుని అందరి దృష్టిని ఆకర్శించాడు. ప్రస్తుతం సెట్ వర్స్ చేస్తున్న ఆయన ఓ ఇంటర్వ్యూలో పాల్గొని తన పరిస్థితి బాలేదని వెల్లడించాడు. తల్లిదండ్రులు మృతి చెందడంతో స్నేహితులతో కలిసి ఉంటున్నానని తెలిపాడు. అలాగే రాఘవ లారెన్స్ ఓ స్కూల్లో జాయిన్ చేయించినప్పటికీ తాను అక్కడి నుంచి వెళ్లిపోయానని అన్నాడు. మళ్లీ ఆయన దగ్గరకు వెళ్తే తిడతారని వెళ్లడం లేదని చెప్పాడు. ఇక ఈ విషయంపై రాఘవ లారెన్స్ ఎమోషనల్ కావడంతో ఈ విషయం తెలుసుకున్న నెటిజన్లు ఆయనపై ప్రశంసలు కురిపిస్తున్నారు.
