ఛత్రపతి గర్జనతో ఆకాశం మారుమోగనివ్వండి.. ‘రాజా శివాజీ’ యాంథమ్ రిలీజ్ డేట్ ఫిక్స్

దిశ, సినిమా: మరాఠా యోధుడు ఛత్రపతి శివాజీ మహారాజ్ జీవిత చరిత్ర ఆధారంగా తెరకెక్కుతున్న ప్రతిష్టాత్మక చిత్రం ‘రాజా శివాజీ’ . బాలీవుడ్ నటుడు రితేష్ దేశ్‌ముఖ్ ఈ సినిమాలో శివాజీగా నటించడమే కాకుండా, స్వయంగా ఆయనే ఈ చిత్రానికి దర్శకత్వం వహిస్తుండటం విశేషం. రితేష్ భార్య జెనీలియా, జ్యోతి దేశ్ పాండే సంయుక్తంగా ఈ భారీ బడ్జెట్ చిత్రాన్ని నిర్మిస్తున్నారు. సినిమా విడుదలకు సమయం దగ్గరపడుతుండటంతో చిత్ర యూనిట్ ప్రమోషన్ల జోరు పెంచింది. అందులో భాగంగా ఈ మూవీలోని మొదటి పాట 'రాజా శివాజీ యాంథమ్' విడుదలకు ముహూర్తం ఖరారు చేశారు. ఏప్రిల్ 13న ఈ పవర్ ఫుల్ సాంగ్ ప్రేక్షకుల ముందుకు రాబోతున్నట్లు ట్విట్టర్ ద్వారా ఓ పోస్టర్ షేర్ చేస్తూ వెల్లడించారు. "ఛత్రపతి గర్జనతో ఆకాశం మారుమోగనివ్వండి.. ప్రతి హృదయాన్ని రగిలించడానికి 'హిందవీ స్వరాజ్య' గీతం వస్తోంది.. మా రాజు మా గర్వం" అంటూ మేకర్స్ ఇచ్చిన క్యాప్షన్ ఇప్పుడు సోషల్ మీడియాలో సెన్సేషన్ క్రియేట్ చేస్తోంది. కాగా.. ఈ సినిమాలో రితేష్‌తో పాటు సంజయ్ దత్, జెనీలియా, అభిషేక్ బచ్చన్, విద్యా బాలన్ వంటి స్టార్ నటీనటులు కీలక పాత్రల్లో కనిపించబోతున్నారు. శివాజీ మహారాజ్ ధైర్యసాహసాలను, ఆయన రాజ్య స్థాపనను వెండితెరపై ఎంతో అద్భుతంగా చూపించబోతున్నారని సమాచారం. భారీ అంచనాల మధ్య రూపొందుతోన్న ఈ చిత్రం మే 1న ప్రపంచవ్యాప్తంగా థియేటర్లలో విడుదల కానుంది.