తిరగేసి చూడు చరిత ..!!

తూటాల మోతలే

గుండె లయలాయే

డ్రోనుల నాదములే

శ్వాస లై పాయెనో

పచ్చని అడివంతా

నెత్తుటి మడుగుగ

పురుటి మంచమై

సెగలు గక్కవట్టెనో

ఒరిగిన బిడ్డలంతా

మళ్ళి జనమమెత్తి

వొడిల కెదిగి వస్తరో

ఎదలల్ల వెల్గుతారో..

నేర్పిన ఆ విద్యలు

ఆ కమ్మని పాటలు

మరపు రావెన్నడూ

చెదరని పోరులూ..

నరకబడ్డ కొమ్మలూ

గాయాల మానులూ

అసమాన త్యాగాల

ఓటమెర్గని గుర్తులు

చిట్లిన ఈ చిగురులూ

నేల రాలిన ఆకులూ

చిందిన కొన్నె త్తురూ

కావెన్నడు ఆగమూ..

మొగులెల్ల కమ్ముకొచ్చి

ఉర్ము మెరుపు లయ్యి

మల్లొచ్చి అల్లు కుంటై

జడివాన జండలయ్యి

అంతమైంది అడవనీ

ఈలలేసి ఎగురుడేమి

వేలవేలు మందగూడి

కూల్చేస్తే గెల్పుగాదు..

తిరగేసి చూడు చరిత

పడిలేసిన కెరటమోలే

పోటెత్తి సముద్రాలెల్లా

పరుగెత్తే ఫోర్సులన్నీ..!!

- ఇక్బాల్

94407 75732