నేత్రయాత్ర

"కళ్ళతో నడక..."

అచ్చు తప్పేం కాదిది,

అచ్చూహల్లుల అక్షరాల దారి.

కుదురుగా సరళ రేఖలై సాగే

వాక్యాల తొవ్వల్లో పదపదాన

మెత్తని చూపుల అడుగులు.

ఆ దారిన.. అంతర్నేత్రాలు

చూసే భావదృశ్యాలు

అరూప రూపాలతో

కదిలిపోయే కళ్లజంట

కన్నులు

ఏ వన్నెజోడు ధరించడమైనా..,

నడక సాఫీగా అనుకూలంగా

సాగడానికే!

ఆ సరళపు బాటల్లోని

నిరంతరాయపు నడకలు

నెమ్మదిగానైనా

ఎగుడు దిగుళ్ళ జీవన మార్గాలతోను

జతకడతాయి.

ఆ అక్షరాల శాద్వలాలు

బతుకు బాటల గరకుదనంపై

సుతిమెత్తగా విస్తరిస్తాయి.

ఆ రమణీయ వాక్యాలు

జీవితాలను నెమ్మదిగా

హృద్యమైన కావ్యాలుగా మలుస్తాయి.

- మడిపల్లి రాజ్‌కుమార్

99496 99215