కడుపుతో ఉన్నప్పుడు పారాసెటమాల్ వేసుకోవచ్చా?

దిశ, ఫీచర్స్ : ప్రెగ్నెన్సీ టైమ్ చాలా విలువైనది. ఈ సమయంలో మనం తీసుకునే కేర్.. కడుపులో ఉన్న బిడ్డ ఆరోగ్యం, భవిష్యత్తును నిర్ణయిస్తుంది. ఈ క్రమంలోనే కడుపుతో ఉన్నప్పుడు పారాసెటమాల్ ట్యాబ్లెట్ వాడొచ్చా లేదా అనే విషయంపై పరిశోధన చేశారు నిపుణులు. ఎసిటమినోఫెన్ అని కూడా పిలువబడే ఈ డ్రగ్ గర్భధారణ సమయంలో ఉపయోగించడానికి అత్యంత సురక్షితమైన నొప్పి నివారిణిగా పరిగణించబడుతున్నప్పటికీ.. అటెన్షన్ డెఫిసిట్ హైపర్యాక్టివిటీ డిజార్డర్ (ADHD)తో కనెక్షన్ ఉందని సరికొత్త పరిశోధన గుర్తించింది. మెదడు అభివృద్ధి విషయంలో ఆందోళనలను లేవనెత్తుతుంది.

ఎసిటమినోఫెన్ దశాబ్దాల క్రితం ఆమోదించబడినప్పటికీ.. ఇప్పుడు FDA ద్వారా రీవాల్యూయేషన్ చేయవలసి రావచ్చు అంటున్నారు పరిశోధకులు. కడుపులో పిండంపై దీర్ఘకాలిక నాడీ అభివృద్ధి ప్రభావాలను తక్కువ అంచనా వేయకూడదని అంటున్నారు. గర్భధారణ సమయంలో ఎసిటమినోఫెన్ అతి తక్కువ మోతాదులలో ఉపయోగించినప్పుడు తక్కువ ప్రమాదాన్ని కలిగిస్తుందని అభిప్రాయపడుతున్న వారు... ఈ డ్రగ్ ఎఫెక్ట్‌ను తిరిగి అంచనా వేయాల్సిన సమయం ఆసన్నమైందని సూచిస్తున్నారు.

ADHD అంటే ఏమిటి?

ప్రపంచ ఆరోగ్య సంస్థ (WHO) ADHDని హైపర్యాక్టివిటీ-ఇంపల్సివిటీ నమూనాగా నిర్వచించింది. ఇది విద్యా, వృత్తి, సామాజిక పనితీరును గణనీయంగా దెబ్బతీస్తుంది. ఒక వ్యక్తి వయస్సు, మేధో సామర్థ్యాలకు సాధారణమైనదిగా పరిగణించబడే దానికంటే ఎక్కువగా ఉంటుంది. దీర్ఘకాలిక ప్రభావాలతో వ్యక్తి ఆరోగ్యం, శ్రేయస్సు, సామాజిక ఏకీకరణ, మొత్తం జీవన నాణ్యతను ప్రభావితం చేస్తుంది. ADHDతో సహా నాడీ అభివృద్ధి రుగ్మతలు అకాల మరణానికి గురయ్యే ప్రమాదంతో ముడిపడి ఉన్నాయి.

ADHDకి కారణమేమిటి?

* జన్యుశాస్త్రం - ADHD ఫ్యామిలీ హిస్టరీలో ఉంటుంది.

* చిన్నతనంలో బాధాకరమైన అనుభవాన్ని కలిగి ఉండటం.

* అకాల జననం

* మెదడు గాయం

* చిన్న వయస్సులోనే పర్యావరణ విషాలకు గురికావడం(అధిక స్థాయి సీసం వంటివి)

* తల్లి ధూమపానం చేయడం, మద్యం సేవించడం

* గర్భధారణ సమయంలో తీవ్ర ఒత్తిడి

లక్షణాలు:

* పనులు లేదా ఆటలపై శ్రద్ధ పెట్టడంలో ఇబ్బంది

* తరచుగా తప్పులు జరగడం

* సూచనలను పాటించడంలో, పనులను పూర్తి చేయడంలో వైఫల్యం

* మానసిక శ్రమ అవసరమయ్యే పనులను నివారించడం (ఉదా., హోంవర్క్)

* రోజువారీ కార్యకలాపాలను తరచుగా మరచిపోవడం

* సంబంధం లేని ఆలోచనలతో సులభంగా పరధ్యానం చెందడం