మనుషుల ప్రాణం తీస్తున్న 'జాంబీ డ్రగ్'.. ఇప్పటి వరకు ఎంతమంది మృతిచెందారంటే..

దిశ, ఫీచర్స్ : అమెరికా తర్వాత ప్రస్తుతం బ్రిటన్‌లో జోంబీ డ్రగ్ విధ్వంసం సృష్టిస్తోంది. దీంతో ఇప్పటికే ఈ డ్రగ్ కారణంగా 11 మంది చనిపోయారు. ఈ ఔషధం చేతులు, కాళ్ళలో గాయాలను చేసి, అది తీవ్రమై రోగి మరణించే అవకాశం కూడా ఉంది. ఈ ఔషధ ప్రభావం ఎక్కువగా చర్మం పై పడుతుంది. దీని కారణంగా శరీరంలోని వివిధ భాగాలలో గాయాలు కనిపించడం ప్రారంభిస్తాయి. దీంతో ఇన్ఫెక్షన్ పెరుగుతుంది. రోగి జాంబీలా కదలడం ప్రారంభిస్తాడు. అందుకే దీనిని జాంబీ డ్రగ్ అని అంటారు. అసలు జాంబీ డ్రగ్ అంటే ఏమిటి, అది మనిషి శరీరంలోకి ఎలా చేరుతుంది. దాని వాడకం ఎందుకు పెరుగుతోంది, అది ఎలా ప్రాణాంతకంగా మారుతుందో ఇప్పుడు తెలుసుకుందాం.

జాంబీ డ్రగ్ అంటే ఏమిటి, అది శరీరంలోకి ఎలా చేరుతుంది ?

Xylazine ఔషధాన్నే జాంబీ డ్రగ్ అంటారు. సాధారణంగా ఈ ఔషధం జంతువులలో సంభవించే వ్యాధుల చికిత్సలో ఉపయోగిస్తారు. అమెరికాలో ఈ డ్రగ్‌కు డిమాండ్ పెరిగింది. అయితే ఓవర్ డోస్ వల్ల మరణాలు సంభవిస్తున్నాయి. అందుకే అమెరికన్ హెల్త్ ఏజెన్సీ CDC దీనిపై కొన్ని పరిశోధనలు చేస్తున్నాయి.

ప్రస్తుతం జాంబీ డ్రగ్‌ను మాదక ద్రవ్యాలతో కలిపి వాడుతున్నారు. కొన్ని కథనాల ప్రకారం డ్రగ్ డీలర్లు కొకైన్, హెరాయిన్ వంటి ఇతర మత్తు పదార్థాలలో జాంబీ డ్రగ్స్‌ను కలుపుతున్నారని పలు సర్వేల్లో తేలింది. అయితే తక్కువ ఖర్చుతో ఈ డ్రగ్ రావడంతో వినియోగం పెరుగుతుంది. అయితే ఈ మందు తీసుకున్న వారి శరీరం పై ఎక్కువ ప్రభావం చూపుతుంది.

ఈ ఔషధాన్ని నార్కోటిక్స్‌తో కలిపి తీసుకుంటే అది మరింత ప్రమాదకరంగా మారుతుందని CDC చెబుతోంది. ఈ ఔషధాన్ని తీసుకున్న తర్వాత ఒక వ్యక్తి స్పృహలో ఉండదు. శరీరంలో గాయాలు కనిపించడం ప్రారంభిస్తాయి. క్రమంగా ఈ పరిస్థితి ప్రాణాంతకంగా మారుతుంది.

ఈ మందు అంత ప్రాణాంతకమా.. ?

ఔషధం శరీరంలోకి చేరిన 20 నుంచి 30 నిమిషాల తర్వాత ప్రభావం కనిపించడం ప్రారంభమవుతుంది. ఈ డ్రగ్ తీసుకున్న వారు స్పృహ కోల్పోవడం ప్రారంభిస్తారు. ఇలా ఆ వ్యక్తులు గంటల తరబడి అపస్మారక స్థితిలో ఉంటే, అప్పుడు శరీరంలో ఒత్తిడి పెరిగి పరిస్థితి మరింత దిగజారుతుందని సర్వేలు తెలిపాయి. అలాగే గాయాలు కూడా అధికంగా అవుతాయని చెబుతున్నారు.

ఈ మందు పై జరిపిన పరిశోధనల ప్రకారం మందు ప్రభావం ఎంత ఎక్కువ ఉంటే అంత ప్రమాదం ఎక్కువ. అపస్మారక స్థితిలో ఉన్న వ్యక్తి ఎప్పుడైనా చనిపోవచ్చు. ఈ ఔషధం రోగిలో నిరాశను కలిగిస్తుంది. కొన్ని సందర్భాల్లో, రోగులు చాలా గందరగోళానికి గురవుతారు. వారు నిరంతరం వాంతులు చేయడం ప్రారంభిస్తారు.

అప్రమత్తం చేసే లక్షణాలు ?

ఈ ఔషధం శరీరంలోకి చేరిన తర్వాత కొన్ని ప్రత్యేక లక్షణాలు కనిపిస్తాయి. అవి వ్యక్తి పరిస్థితి మరింత దిగజారిందని సూచిస్తుంది. శ్వాస తీసుకోవడంలో ఇబ్బంది, రక్తపోటు పడిపోవటం, తక్కువ హృదయ స్పందన రేటు, శరీరం పై గాయాలు, వాటి సంక్రమణ వంటివి. ఇలాంటి లక్షణాలు కనిపిస్తే అప్రమత్తంగా ఉండి వైద్యులను సంప్రదించాలి. ఇలాంటి డ్రగ్ ఓవర్ డోస్ కేసుల్లో రోగులకు నలోక్సోన్ అనే మందు ఇస్తారని CDC చెబుతోంది. ఇది మత్తు పదార్థాల ప్రభావాలను తగ్గించడానికి పనిచేస్తుందని తెలిపారు.